AMED - Nazenîn Amaç yew zî ciwanê ke Tirkîya de seba polîtîkayê îqdîtarî nêeşkena karê xo bikero ya. Nazenîna ke Beşê Weşîya Fek û Didanan wenda, nêeşkena karê xo bikera û nika bi keda destê xo berardiş kena û debara keyeyê xo kena. 

 

Tirkîya de her roja ke derbaz bena hûmara bêkaran zêde bena. No çî verê Tirkîya de sey problemêk sereke vindeno. Polîtîkayê xelet yê îqtîdarî benê sebebê feqîrîya welatiyê ciwanan. Xeylêk kesê ke unîversîta qedênayê karê cîya cîya kenê. Nînan ra yew zî Nazenîn Amaç a. Nazenîne Beşê Weşîye Fek û Didanan qedênaya û la atamayê ci nîno kerdiş. Nazenîne 3 serrî yo bi keda destê xo berardiş kena û pê debara xo û keyeyê xo kena.

 

'Ma pê debara xo kenê'

 

Nazenîne, dîyar kerd ke vernê de keye de xebityaya û wina vat: "Mi vernê de keye de çîyan kerd û dima ra mi dikanêke akerd ke nê çîyan biroşî. Ma hîrê wayê û birayê û ma çîyan bi xo viraznenê û pê debare xo kenê. Vernê de birayê mi nê karî rê eleqedar bîne. Dimayê ke mi unîversîte qedêna tayînê mi nêbi û seba problemê ekonomî mi qerar da ke ez nê karî bikerî. Gerdenî û bazinê ke bi epoks û ahşap yenê viraştiş ma viraşt. Sewbîna ma çîyê dîyarî zî viraznenê û roşenê. Reyan zî ma kerrayan nexş kenê. Birayê mi dizayn keno û ma zî roşenê."

 

'Ma problemê ekonomî ciwîyenê'

 

Nazenîne dewam de wina qal kerd: "Ma nika problemê ekonomî ciwîyenê. Ma sey ciwanî hewl danê ke serê lingan de bimanê. La her roje ma bi problemêko cîya dir rî bi rî manenê. Nika zêde ma nêeşkenê çîyan biroşê û seba nê zî ma nêeşkenê fatûre û kîrayê xo bidê. Ameyîşê ke ma standart çin o. Çîyê ke ma gênê zî zaf vayê. No çî tesîr serê ma de keno."

 

'Karê ke ma kenê xeylêk kede wazeno' 

 

Nazenîne, dîyar kerd karê ke kenê zehmet o û wina vat: "Karê ke ma kenê xeylêkî zehmet o û kedêke pîl wazeno. Reyan ma gerdenî yan zî bazin mîyanê 3 rojan de vejenê. Zimparayê awe, cîla û vernîk heme merheleyê karê ma yo. Çîyê ke ma kenê zirar dano dest û engiştanê ma. Keda ke ma danê seba xeylêk şarî hende girîng nîya. Ez serê sibayî heta şan de xebityena. No çî zî beno sebebê dejî. Dima ra muşterî yenê û vanê, nê çira hende vayê."

 

'Bi seyan bêkarî yê unîversîte estê'

 

Nazenîne tewr peyîn wina vat: "Ma madeyê ke xebitnenê Amed û xeylêk reyan bajarê cîya ra anê. Labelê her demê vaye înan zî zêde benê. Goreyê çîyê vayî vuryenê. Seba ciwanan ganî wareyê kar bêrê awankerdiş. Bi seyan bêkar estê û unîversîte qedênayê. Her kes êdî hewl dano ke debara xo bikero."