‘Şar û bawerîyê bînî do Rojawan de serbikewê’ 

2025-01-07 10:53:30


	 

	Melek Avci

	 

	ANQARA - Yuksel Mutlu, dîyar kerf ke ganî şarê Sûrîye û bawerîyê mîyanê nê şerê Rojawanî de yê, wayîr vejîyê û vat: “Modelêk ke ê do sey rolê xo bigîrê, zergûn bibê kewtê a herre. Wexto ke ma nê vînenê, ma vînenê ke o model a herre ra nîno vetiş û uca de ca girewto.”

	 

	Wexto ke şerê Sûrîye dewam keno, medyaya dîjîtale û çapamenî de dîmenê teda û şîdetê şarî ser û bawerî ser hetê HTS û SMO ra yenê mojnayîş. Şar û bawerî ameyoxê xo ra bi endîşeyîn ê, Îdareya Xoserî ya Vakur û Rojhelatê Sûrîye ke modelê cuya pîya pê ardê, semedê Rojhelatê Mîyanên sey modelêk nimûne yeno mojnayîş.

	 

	Komîsyonê Şaran û Bawerîyan ê Partîya Têduştî û Demokrasî (DEM Partî) ra Yuksel Mutlu rewşa şarî û bawerîyê herême ercna.

	 

	Şerê parçebîyayîşî yê emperyalîstî

	 

	Yuksel Mutlu, derheqê şerî de wina vat: “61 serrî bî ke dîktatorî û rejîmê Baasî est bî. Rejîmêk est o ke  babîyê Esedî ra derbazê lajê Esadî bîyo. Wexto ke ma rewşa kaotîk ke nika ciwîyenê ra ewnîyenê, Rojhelatê Mîyanên kewto dîzaynêk newe. Hêzê mîyanneteweyî ci de est ê. Îran, Rûsya, Sûriye û heto bîn ra Amerîka û welatê Yewîya Ewropa est ê. Aseno ke Rojhelatê Mîyanên sermayedarê bi hêzî hewl danê ke netew-dewletê neweyî awan bikerê. Ê êdî nê dir nêşuxilênê û bi dîzaynêk newe vejîyenê. No kaosî de parekerdişê emperyalîstî est o. Hemverê nê de xoverdayîş est o."

	 

	'Şer semedê şar û bawerîyê herême tehluke yo'

	 

	Yuksel Mutlu dewam de wina vat: “Wexto ke Esadî şewe berdî Moskova, herême teslîmê HTŞyî kerdî. Bêşik no projeyêk ke verê ra ameyo amadekerdiş û plansazkerdiş ke teslîmê Colanî ame kerdiş. Nê semedî ra kaos û şer, wêranî est o. Nê kaosî de dej, koçberî û zirarê cinî, tutî û kesê ke ameyê qetilkerdiş û tecawizkerdiş est o. Şer uca de semedê şar û bawerîyan tersêk pîl awan keno. Çira, semedo ke îdareyo nikayîn rêxistinêk cîhadîst o. Ma qalê koalîsyonî kenê ke xeylêk rêxistinê cîhadî arê dano. Uca de rewşêka îdeolojîk est a. A rêxistinêke îslamîst, cîhadîst, nijadperest û neteweperest a."

	 

	'Şar û bawerîyê uca do ser bikewê’

	 

	Yuksel Mutlu dîyar kerd ke semedê nasnameyê elewî yê Beşar Esadî, şar bî hedefê rêxistinê cîhadîstî û wina vat: “Beşar Esad yew kes bî û komelê ke îdare kerdêne elewî nê, temamê komeleyê Sûrîye bî. Ma vajê Esad bi hawayêk teberê demokratîke û dîktatorî îdarekarî kerd, la gelo mimkûn o ke merdim yanişîyê îdarî yê kesêk bikero milê rayaumûmî? Rojawan modelê şarî yo. Şarêk semedê nê çira bêro cezakerdiş? Şar û bawerîyê ke uca de yê tersenê. La wexto ke ma modelê Rojawanî uca de vînenê, ma eşkenê vajê ke êdî o model a herre ra nîno vetiş, êdî uca de ca girewto. Zehmetî est ê, la îmkanê ma zî est ê. Her ke Rojhelatê Mîyanên ver bi nê dîzaynî ra şino, şar  û bawerîyê ke uca de yê serkewte bibê.”

	 

	Berpirsiyarîyêk pîl semedê cinîyan

	 

	Yuksel Mutlu vat, ganî her kes paştdayîş bido projeyê neteweya demokratîke û wina qedêna: “Ganî şarê bindestî yê pêro dinya de ciwîyenê, paştdayîş bidê yewbînan. Eke nêro îddîakerdiş do çimeyê erdî ser û binê erdî yê nê erdan teslîmê îqtîdaran bêro kerdiş. Ma şandînan temaşe kenê, camêrdê bi cil û belgê dergî destên înan de yo, heme zî analîstê şerî yê. Serê şîdetê cinîyan de giranî nîno dayîş, çekûyêk tewr qij zî feqîrbîyayîşê nê komelan; feqîrî, wêrankerdişê şerî, mîlîtarîzekerdiş û serdestîyê camêrdan nîno vatiş. Yê ke şer dewam kenê camêrd ê, yê ke şer pawenê camêrd ê, yê ke şer bi daran verê ekranî de analîz kenê camêrd ê."