MÊRSÎN - Mêrsîn de Dayîkanê Aştîye yê ke her wareyî de cuya komunal esas gênê, bi kedêk kolektîf salçe virazenê û wina vatî: “Ma dayîkî lazim o ke xo rêxistin bikerê û her wareyê cuye de komunanê xo awan bikerê. Cuya komunal, cuya merdimayî ya.”

 

Dayîkanê Aştîye yê ke Mêrsînî de ciwîyenê, fehmê cuya komunal tena bi mitîng, eşkerayî û çalakîyan sînordar nêkenê. Cuya rojane de cuya hembeşî esas gênê û bi modelê komunî semedê zimistanî salçe amade kenê. No mîsalê komunî yê ke bi kedêk hembeşî yeno domnayîş, hem piştîdayîşî xurt keno, hem zî kulturê komunî senîn yeno domnayîş danê vernî. Derheqê mesela de Dayîkanê Aştîye ajansê ma rê qisey kerdî.

 

‘Cuya komunal cuyêka merdîmayî ya’  

 

Emîne Eren va ke sey Dayîkanê Aştîye Mêrsînî de cuya komunal awan kerdî û wina dewam kerd: “Ma zî mîyanê xo de komun awan kerd. Ma yewbînan rê hetkar benê. Ewro xebata mi est a, heme ameyî. Siba yê dayîkêka bîne est a ma ancî heme kom benê û pîya şinê. Ma hewl danê tîya cuyêka komunal awan bikerê. Cuya komunal cuyêka merdimayî ya. Her cayî de komunî bibê do cuye weş û asan bibo.”

 

‘Ma hamnanî bi îsot debare kenê’

 

Emîne Eren viraştişê salçeyî qal kerd û wina va: “Edene de Homurlu de keyeyê naskerde est ê û erdê înan est ê. Vanê bêrê semedê ma îsot arêbidê. Ma dayîkî wesayîtan gênê û pîya şinê. Ma îsotan kenê salçe. No serê sibayî mi mesaj şirawit Dayîkanê Aştîye rê ke hetkarî bidê ma. Ê zî no siba ameyî. Ma bi pîya îsotan pak kenê û kenê makîne.”

 

‘Lazim o ke her cayî de komunî bêrê awankerdiş’

 

Emîne Eren peynîya qiseykerdişê xo de dîyar kerd ke lazim o ke her cayî de komunî bêrê awankerdiş û wina dewam kerd: “Sere de dayîkî lazim o ke her kes xo rêxistin bikerê û komunan awan bikerê. Eke cimat pê dir ciwîyayîş bimuso do cimat zî azad bibo. Komunî semedê her kesî şert ê. Berpirsîyarîyê pîlî milê cinîyan ser o yê. Dayîke cuye ya. Ez venga heme dayîkan kena ke komunanê xo awan bikerê.” 

 

‘Ma kom benê û xebate kenê’

 

Maşallah Şeker zî dîyar kerd ke ê her wareyê cuye de pîya yê û nê ercnayîşî kerd: “Ma heme semedê pakkerdişê îsotî û viraştişê salçeyî tîya kom bîyî. Ma serê sibayî ra îsot pak kenê û danê makîne ro. Semedê hetkarîya Dayîka Emîne ma ameyî tîya. Kam ci xebate bibo ma pîya kenê. Çi destê ma ra yeno ma kenê. Ez venga heme kesî dana. Wa piştîdayîşê yewbînan bikerê.”