WAN - Dayîka Aştîye Hediye Koçak ya ke lajê aye xoverdayîşê Kobanê de şehîd bîyo da zanayîş ke çareserîya problemê kurdî bi azadîya fîzîkî ya Rayberê Şarê Kurdî Abdullah Ocalanî mumkin o û va: “Bi rijnayîşê gonî aştî mumkin nîya. Goş bidê serekî. Heta serekê ma bêro veradayîş do têkoşîn bidomîyo.”

 

Şar 6ê çeleyî ra heta nika hemverê hêrişê HTŞ û komê çeteyanê girêdayeyê Tirkîya yê Rojawanî ser o xo ver dano û dimayê xoverdayîşî 30ê çeleyî de peymana entegrasyonê demokratîk û adirbestî ame îmzakerdiş. Labelê pêwa adirbestî ablûqaya Kobanê roja 27yemîn de dewam kena. Kobanê ewro nê, verê zî hetê çeteyanê DAIŞî ra hedef ame girewtiş. Hemverê nê hêrişan de şarê kurdî tewrê xoverdayîşê Kobanê bi. Yew nînan ra lajê dayîka Aştîye Hediye Koçak, Serhat Koçak (Xwînreş Qurtay) bi. Serhat Koçak dimayê tewrbîyayîşê xoverdayîşî di aşmî beno, dima ra şehîd beno. Lajê aye yo bîn Îskender Koçak zî tewrê têkoşînê azadîye beno. Hediye Koçak derheqê komployê mîyanneteweyî û komployê mîyanneteweyî yê diyîne ê Rojawanî ser o qisey kerd.

 

‘Komployê 15ê Sibate veng ame vetiş’

 

Hediye Koçak da zanayîş ke komployê 15ê Sibate yê hemverê Rayberê Şarê Kurdî Abdullah Ocalanî veng ame vetiş û wina va: “Serekê ma waşt şarê kurdî sey şarê bînî biciwîyo. Serekê ma her tim aştî waşt. Ewro zî semedê aştîye têkoşîn keno. Bahçelî va ‘statuyê kurdan bêro naskerdiş’ labelê ancî komplo pê ardî û hêrişî Rojawanî kerdî. Rojawan de cinî, tutî, sivîlî ameyî qetilkerdiş. No komployê ma babeta huqûq û wijdanî yo. Nê hêrişî bi tu hawayî nînê qebûlkerdiş. 2014ine de zî Kobanê kerdî binê ablûqa. Ewro zî eynî çîyî kenê. Rojawan de şarê ma yeno qetilkerdiş. Vernîya aştîye gênê. Ez venga dewletan kena; Rojawan de aştîye pê bîyarê û ablûqa wedarnê.”

 

Lajê aye 2014ine de xoverdayîşê Kobanê de têkoşîn domna

 

Hediye Koçak da zanayîş ke lajê aye Serhat Koçak (Xwînreş Qurtay) 2014ine de xoverdayîşê Kobanê de şehîd bîyo û wina ard ziwan: “Ma dayîkê aştîye, aştîye wazenê û semedê nê têkoşîn kenê. Semedê aştîye ma 2014ine de şî sînorê Kobanê nobete girewtî. Lajê min zî mi dir ameyîne nobete. Dima ra o zî şi Kobanê. Dimayê ke şi, di aşmî

 

dima ra şehîd bi. Ez hemverê şehîdê xo rêzdar a. Heme şehîdî tutê ma yê. Heme şehîdê ma semedê mi Serhat ê. Tutê ma yenê qetilkerdiş, yenê tepiştiş. Keyeyê ma, dewê ma yenê veşnayîş. Ciwanî semedê bîyayîşê xo têkoşîn kenê, îqtîdar înan erzeno zîndan. Ez venga şarê Kurdistan û dinya kena; wa semedê Rojawanî têkoşînê xo bidomnî.”

 

‘Ma do têkoşîn bikerê’

 

Hediye Koçak her wina bale antî serê azadîya Rayberê Şarê Kurdî Abdullah Ocalanî û eşkera kerdî ke heta azadîya fîzîkî pê nêro do têkoşînê xo bidomnê. Hedîye Koçak wina peynî ard: “Ma aştîye wazenê, ê şer ferz kenê. Şarê kurdî nê rayîrî de xeylêk bedel dayî. Gilayê cinîyê xoverdayoxan ameyî birnayîş. Awanîyan ra ameyî eştiş. Ne wijdan, ne exlaq ne huqûq mendo. Tutê ma semedê aştîye şehîd kewtî. Heta serekê ma azad nêbo do têkoşînê ma zî bidomîyo. Pêwa peymane ablûqaya Kobanê dewam kena. Ganî lezkî ablûqaya Kobanê bêro wedarnayene û peymane bikewa pratîk.”