STENBOL - Dayîkanê Aştîye dîyar kerd ke seba awankerdişê Aştîyeyêka bi rûmet têkoşîn kenê û waştişê veradayîşê pêro girewtoxan, bi taybetî Abdullah Ocalan û wedardiştê qedexeya qanûnî ya ziwanê dayîke kerd. 

 

Bi vengdayîşê 27ê sibate ya Rayberê Şarê Kurdî Abdullah Ocalanî, prosesêko tarîxî dest pêkerd. Yew gamanê tewr eşkeran ê na prosesî merasîmê veşnayîşê çekanê PKKyî bî ke 11ê temûze de bajarokê Silêmanîyeyî yê Başûrê Kurdîstanî de ameye organîzekerdiş. Na merasîm nuqteyêka muhîm bîye ronayîşê bingehanê Aştîye de. Averşîyayîşêka bîne ya muhîme rayîrê Aştîye de ronayîşê "Komîsyonê Yewgirewtişê Neteweyî, Waye-Birayîye û Demokrasîye" Parlamento de 5ê tebaxa 2025 de bî. Labelê Dayîkanê Aştîye, kombîyayîşê 20ê tebaxe de wexto ke ameyêne goşdarkerdene, qiseykerdişê înan ê kurdkî ameyî astengkerdene. 

 

'Ez sey dayîke na bêedaletî qebul nêkena' 

 

Kumru Akgun tekez kerd hewcedarîya awankerdişê prosesê Aştîye ser o û va ganî girewtoxî veradayê: "Ma wazenê girewtoxê ma zindanan ra bêrê veradayene. Her rey înfazê înan yenê veşnayene. Hevala ma ya seqete Zindanê Bakîrkoyî de seba ke spor nêkena ameye cezakerdene. Ez sey dayîke na bêedaletî qebul nêkena. Cinîyê 70 û 80 serrî zindan de rastê îşkence û zulmî yenê." 

 

'Ma qedexeya ziwanê xo ser o qebul nêkenê' 

 

Rabîya Mihtayî, yew Dayîkanê Aştîye ra, va Parlamento de destûr nêdanê ke kurdkî bêro qiseykerdene: "Wexto ke ma şîyê Parlamentoyî, heta destûr nêdayî ke ma bi ziwanê xo yê dayîke qisey bikerê. Kurdkî hema zî qedexe ya. Çira? Ma çi waştibe zî, ma ameyê qedexekerdene. Na proses de, ganî qedexeyê ziwanê ma ser o wedarîyê."

 

'Heta rayberê ma azad nêbo, ma nêşênê azad bibê' 

 

Gulsum Ozturk va seba Aştîye cehd kenê labelê gamanê eşkeran nêdîyî: "Sey cinî, ma destê xo danê yewbînî û vanê ma şer nêwazenê. Dayîkî nêwazenê kes bigirîyo. Seba naye ma her roje meydanan de yê û vengê xo berz kenê. Ma wazenê kiştiştê cinîyan biqedîyo û girewtoxî veradayê. Vernîya her çîyî, ma azadîya rayberê xo wazenê. Heta rayberê ma nêyero verê şarê xo, ma nêşênê azad bibê."