ÎZMÎR - Cinîyan reaksîyon vera qerarê xirakerdişê cezaya muebetê giran ke kiştoxê Pinar Gultekîne, şikdar Cemîl Metîn Avci rê amebi birnayîş, mojnayî û vatî; ê qerarê hukmî yê ‘sûcê bi hîsê cinawirî qetilkerdiş çin o’ qebûl nêkenê.

 

Cinîya bi nameyê Pinar Gultekîn 16ê Temmuze serra 2020ine de Mûgla de hetê Cemal Metîn Avci ra amebî veşnayîş û qetilkerdiş. Dewaya qetilkerdişê Pinar Gultekîne de cezaya muebbetê girankerde versuc Cemal Metîn Avci rê amebî birnayîş û dima ra zî dadgehe bi îdiayê “tehrîkê nêheq” ra cezaya Metîn Cemal Avci vistibî 23 serran. Avukatan zî semedê betalkerdişê qerarê vistişê cezaya versucî, muracatê Îstînafî kerdibî. Qerarê vistişê cezaya versucî yê bi sebebê “tehrîkê nêheq”, hetê Dadgeha Edliyeyî yê Herêma Îzmîrî ra ame betalkerdiş. Nê ser de avûkatê versucî muracatê Dadgeha Berzî kerd. 1ine Daîreyê Cezayan ê Dadgeha Berzî zî îdia kerd ke şikdar Metîn Cemal Avci, cînayet “bi hîsê cinawirî nêkerdo” û va ke ganî semedê “tehrîkê nêheq” ceza bêro vistiş. Dadgeha Berzî, hemverê 2 rayan bi 3 rayan qerarê Dadgeha Edliyeyî yê Herêma Îzmîrî betal kerd. 

 

Îzmîr de cinîyê temsîlkarê partîyê sîyasî û rêxistinê cinîyan reaksîyon vera qerarî mojnayî.

 

‘A ceza zî bi zextê cinîyan girewtibî’

 

Pîrebokê Kampusî ra Sena Tekîn wina va: “Semedê zextan ceza şikdarî rê ame birnayîş. La nika dadgerî ceza xira kerd. Cinîke bi îşkence amî qetilkerdiş. Dadgerî vano; bi ‘hîsê cinawirî nêkerdo’. Ganî no bêro cipersayîş. No nêzdîbîyayîş cesaret dano şikdaran. Helwestê îqtîdarî yê hemverê qetilkerdişê cinîyan dewam keno. Hemverê nê de ma têkoşînê femînîstî berz kenê. Pawenê ke cinî tutan bîyarê dinya. La pêro bar serê milê cinîyan de ameyo barkerdiş. Unîversîteyan de zî rewşe eynî ya. Akademîsyenê tacîzkar, helwestê nîjadperestî. Ma îqtîdarêk ke nêwazenê cinî biwanê dir rî bi rî yê.”

 

‘Sîstemê edaletî hemverê cinîyan de yo’

 

Paştdayîşê Mor Denîz Uslu zî wina va: “Qerarê şikdarî Mertcan Avci ke hetkarî da şikdar ame veradayîş. Badê nê bi îstînafî qerarê muebetê giran ame dayîş. La dadgerî xira kerd. Sîstemê hukmî kîşte şikdaran de ca girewt. Bi destê îqtîdarî polîtîkayê dişminê cinî kewenê vernîya ma. Ma hemverê qerarî matmayî nêmendî. Ma hemverê nê ganî têkoşînê xo berz bikerê. Na rewşe de asayîşê tu cinîyêke çin o. Ez vengdayîşê têkoşînê yewbîyaye kena.”

 

‘Dewaya cinîyan de polîtîkaya îqtîdarî vejêno vernê’

 

Endama Meclîsê Cinîyan ê DEM Partîye Aysel Onen zî wina va: “Huqûq nêmendo. Dewaya Pinar Gultekîn de huqûq vano, ‘hîn daye est ê, ma netîceya îstînadan resayî nê’. No netîceyê huqûqî nîyo. Ma polîtîkayê îqtîdarî yê hemverê cinîyan dir rî bi rî yê. Ganî ma heqê xo yê topyekun bişuxilnê û îtîraz û vengê xo xurt bikerê. Cinî bêerj yenê verdayîş. Semedê nê sîstemî hewcedarî bi yewîya cinîyam est o.”