Pelşîn Çetînkaya

 

AMED - Ruçem Vefa Elyakut ke rojê vîyarte de 6. kongreya awarte dir hemsereka DBP’yî ya Amedî amî weçînayîş, dîyar kerd ke do ala ke dewr girewtê berzêr bikerê. Ruçem Vefa Elyakut dîyar kerd ke do mesajê "xo rêxistin bikerê, rêxistin bikerê" yê Rayberê Şarê Kurdî Abdullah Ocalanî xebatê xo dewam bikerê.

 

Rêxistina Partîya Herêmanê Demokratîke (DBP) ya Amedî 27ê nîsane de bi şîarê "Bi komelê azad ma ver bi azadîye rayîr ra şinê" 6. kongreya xo ya awarte Salona Ayaz Elegance viraşt. Bi seyan kesî tewrê kongreye bî û hemserekê neweyî ameyî weçînayîş. Semedê hemserekî Ruçem Vefa Elyakut û Ahmet Dogan ameyî weçînayîş. Ruçem Vefa Elyakut derheqê xebatanê xo de qisey kerd.

 

Ruçem Vefa Elyakut dîyar kerd ke mîyanê sîyasetî de ameya dinya û va: “Sîyaset zanistîyêk çimdarî yo. Ez zî bi wendiş, nuştiş û çimdarî tewrê prosesî bîya. Ez timî mîyanê sîyasetî de bîya. Partîya ma de temsîlkarîya têduştî û hemserekî est a. Cinî bi serran o çin yenê hesibnayîş. Bi sîyaseto ke têgêrayîşê azadîya kurdî awan kerd, hemverê çinhesibnayîşî têkoşîn ame dayîş. Serdestîyê camêrdî hewl da cinîyan çin bikero la hemverê nê de xetêke cinî amî awankerdiş. Ma zî sey Birêz Ocalanî vanê ke ganî temsîlkarîya têduştî bibo. Bi no hewa ma eşkenê vajê ke temsîlkarîya têduştî bibo. Ma eşkenê bi no hawa hemverê sîstemê serdestî yê camêrdî de vinderê.”

 

'Vengdayîş bî sebebê hêvîye'

 

Ruçem Vefa Elyakut dewam de wina va: “Badê vengdayîşê Ocalanî hêvîyêke newe pê amî. Dimayê nê ma bi şîarê "Xo rêxistin bikerê, rêxistin bikerê’ vejîyayî rayîr. Nê hetî de ganî ma şarî dir rûşê û qisey bikerê. Semedê nê ganî ma bi ruhê seferberî têbigêrê. Ma eşkenê senî paştdayîş bidê proses, bifikrîyê. Xebatê ma nê hetî de bê. Ganî her kes wezîfeyê xo bica bîyarê.”

 

‘Ewilî komelêk demokratîk..’

 

Ruçem Vefa Elyakut dîyar kerd ke faktorê demokratîkbîyayîşî şert o û wina qedêna: “Ma bi komelêk demokratîk bawer kenê. Şar êdî nê hişmendî de yo. Semedê komel hetê ameyoxî de bi endîşeyîn o. Hêvîya xo vînî kerdê. Ez sey kesêk Amed de ciwîyena eşkena vajî ke hewl yeno dayîş ahlaq bêro vînîkerdiş. Ma bi komelê demokratîkî, bi ciwan û cinîyan eşkenê nê çareser bikerê.”