Elfazî Toral

 

STENBOL - Merdimê tepişteyan dîyar kerdî ke tepişteyê nêweşî yê rewşa înan her ke şina giran bena ganî bêrê tahlîyekerdiş û vatî: “Ganî dewlete lezkî gaman bierza. Ganî tutê ma bêrê tahlîyekerdiş.”

 

Zîndanan de semedê caardişê giranî yê tecrîdî binpaykerdişê heqan zêde benê. Tepişteyê nêweşî rewşa înan roj bi roj giran bena. Erdal Ozel û Salman Akpinar di tepişteyê ke hezaran tepişteyê nêweşan ra yê.

 

Erdal Ozel 2006ine de Kanaryayê Stnebolî de sereştişê keyeyî de ame destbendkerdiş, 15 rojan destbendkerde mend û cezaya muebetî ci rê amî birnayîş. Erdal Ozel zîndanê Tîpa Ryê Metrîsî de maneno, 2012ine de teşîsê şîzofrenî ame ronayîş.

 

Salman Akpinar ke vilakerdoxê rojnameyê Ozgur Gundemî bî, hêrişo ke 8ê teşrîna peyêne 2009ine de Kuçukçekmeceyê Stenbolî de virazya de û kesêk dinyaya xo bedelnaye ser o berpirsîyar ame vînayîş û ame tepiştiş. Derheqê Salman Akpinar de di rey cezaya muebetî amî dayîş. Salman Akpinar zîndanê Tîpa Fyê Bucayî yê Îzmîrî de maneno, nêweşê mîde û astimî yo û semedê emelîyatê linga xo zehmetî anceno û nêeşkeno rayîr ra şêro.

 

Keyeyê Erdal Ozel û Salman Akpinar derheqê rewşa tutanê xo de ajansê ma rê qisey kerdî û dîyar kerdî ke rewşa înan her ke şina giran bena û ganî lezkî bêrê tahlîyekerdiş.

 

Waya Erdal Ozel ke zîndanê Tîpa Ryê Metrîsî de maneno, Kumru Akgul, da zanayîş ke rewşa birayê aye her ke şino giran bena û ganî lezkî bêro tahlîyekerdiş û va: “Erdal semedê problemanê weşîye nêeşkeno hewcedarîyê xo ca bîyaro. Hewteyo vîyarte şîya serdayîşê ey. Rewşa ey qet baş nîya. Erdalî derman nêkenê. 21 serrî yo tepişte yo. Zîndanê Tekîrdagî de ameyîne tepiştiş la berdî Metrîs. Erdalî zîndan de krîzê qelbî derbaz kerd. Anjîo bi. Sereyê Erdalî dejeno. Ganî 15 rojan reyke derzenî xo ro do. Semedê serra 2028ine randevu dayê Erdalî. Serrêke û 9 aşmî yo Erdal Metrîs de odayêk de yeno tepiştiş. Wa tutanê ma vera bidê ma derman bikerê. Ne merdimayî, ne wijdan û ne zî mislimantî menda. Tutanê ma ma ra gênê û benê.”

 

Semedê wezaretê edaletî vengdayîş

 

Kumru Akgul dewam de wina va: “Vanê ke ma do çareser bikerê. Çareserî wina nêbena. Çareserî ganî mende bo. Ganî zerrî ra û dûrist bê. Wa tepişteyan vera bidê. Vengdayîşê Abdullah Ocalanî ser o aşmî derbaz bî la hema dewlete gamêke nêeşta. Tecrîd hema zî dewam keno. Ganî lezkî game bêrê eştiş. Kes nêeşkeno ma bixapîno. Nika bi hezaran tepişteyê nêweşî est ê. Ganî bêrê veradayîş. Ez venga wezaretê edaletî kena. Wa tutanê ma vera bidê.”

 

‘Ganî dewlete berpirsyarîyê xo ca bîyaro’

 

Dayîka Salman Akpinar, Koçer Akpinar zî dîyar kerd ke aye şîya pêvînayîşê lajê xo la qet rewşa ey baş nîya û va: “Hewteyê vîyarte ma Stenbol ra şî Îzmîr pêvînayîşê ey. Va, roje de di rey nan danê la kêmî danê înan. Va, testê ke ameyê kerdiş de nêweşîyêk mîkrobîk ê bînî vejîyaya. Lajê mi 16 serrî yo tepişte yo. Pêwa nêweş o nîno veradayîş. Wexto ke benê revîr zî destê ey kelepçe kenê. Lajê mi zîndanê Îzmîrî de yo. Ma ra dûrî yo. Çend serrî yo uca de yo. Ma nêeşkenê şêrê. Rewşa ma ya ekonomî baş nîya. Wa lajê mi vera bidê. Tu sûcê lajê mi çin o. Bê delîl, yeno tepiştiş. Ganî pêro tepişteyê nêweşî bêrê veradayîş. Waştişê ma o yo ke dewlete gamêke bierzo. Wa dewlete berpirsyarîyê xo ca bîyaro.”