Rabîa Onver

 

WAN - Hemsereka DEM Partîye ya Wanî Gulşen Kurt, dîyar kerd ke badê mesajê Rayberê Şarê Kurdî Abdullah Ocalanî 8ê Adare û Newroze de şar bi ruhê aştî û azadîye vejîya meydan û va: "Pêwa ke her kes bi nê rengî bi hêvî yo û vengdayîşî ko kenê, ma paweyê ke hukmat tewr lez gamanê pratîkan bierzo.” 

 

Hemsereka Partîya Têduştî û Demokratîke ya Şaran (DEM Partî) ê Wanî Gulşen Kurt derheqê babete de ajansê ma rê qisey kerd û bale antî serê prosesî. 

 

Vengdayîş û Newroza tarîxî 

 

Gulşen Kurt dîyar kerd ke xitimnayîş û şîdetê bi seserran o meseleya kurdî ameya ferzkerdiş, bi vengdayîşê tarîxî yê 27ê Sibate ya Rayberê Şarê Kurdî Abdullah Ocalanî prosesêk newe dayo destpêkerdiş û va: "Proseso ke bi mesajê tarîxî yeno dewamkerdiş 8ê Adare û Newroze de meydan de mojna yo. Ma vîna ke badê nê vengdayîşî taxan û kolanan de coş û hêvîyêke pîl mîyanê şarî de virazîya. Şarî zî mojna ke pey vengdayîşê birêz Abdullah Ocalanî yê. Pîrozbayîyê Kurdistan û Tirkîya bîyî Newrozê tarîxî."

 

'Cuyêka bi rumet û demokratike hewce kena’

 

Gulşen Kurt, dîyar kerd ke aştî û komelê demokratîkî  Vengdayîşê Seserre yo û semedê aştîya bi rûmet tewr lez demî de pê bêro, ê do têkoşîn bikerê û wina va: "Bi milyonan kes waştişê azadîya fîzîkîkî ya birêz Abdullah Ocalanî keno. Ganî hukmat gamanê pratîkan bierzo û çîyo muhîm hem sewîyeya qanûnî û hem zî sewîyeya destûrî de prosesê qanûnî bido destpêkerdiş. Lazimîya nê welatî bi aştîyêke bi rûmet û cuyêka demokratîk est o."

 

'Ganî hukmat gaman bierzo'

 

Gulşen Kurt, dîyar kerd proseso ke serkêşîya cinî û ciwanan de ameyo destpêkerdiş û va: "Cinî û ciwanan mojnayî ke paradîgmaya Birêz Abdullah Ocalanî ko kerdî û serkêşîyê cuyêke newe ke yeno awankerdiş, bîyo. Posterê Birêz Abdullah Ocalanî her cayî de ameyî akerdiş û bawerîya ciwanan ê bi Abdullah Ocalan zî ardî ziwan ke ê pey nê vengdayîşî bîyî. Ma paweyê ke tewr lez gamê pratîkî bêrê eştiş."