STENBOL- Şûbeya ÎHD’yî ya Stenbolî seba protestokerdişê destsernayîşê Şaredarîya Şîşlî ya Stenbolî vernîya awanîya komele de beyanatêk da.

 

Hemsereka Pêroyî ya Şûbeya Komela Heqanê Merdiman (ÎHD) ya Stenbolî Eren Keskîn û xeylê pawitoxê heqê merdiman beşdarê çalakî bîyî. Çalakî de pankartê bi nuşteyî “Qeyûmî rê nê! Îradeya şarê rê rêze bigîrê” ameyî akerdene û sloganê “Do qeyûmî şêrê, ma do bimanê” ameyî vatene.

 

Eren Keskîn dîyar kerd ke destsernayîşê şaredarîyan vera hiqûqî yo û dîyar kerd ke destsernayîşê Şaredarîya Şîşlî destsernayîşê vera îradeyê weçînotaxanê kurdan o û vat: “No dişmenîya vera şarê kurdî yo. Hetêk ra behsê proseso newe yeno kerdene la hetê bînî ra zî vera şarê kurdî dişmenî yena kerdene. Destsernayîşê şaredarîyan bi tu hewayî nêyeno fehmkerdene.”

 

Sereka Şûbeya ÎHD’yî ya Stenbolî Gulseren Yolerî zî ard vîrê ke heta nika dest dayo 13 şaredarîyan ser o û vat ke destsernayîşê şaredarîyan vera prensîbanê dewleta hiqûqî ya demokratîke yo.

 

ÎHD’yî derheqê destsernayîşê şaredarîyan Wezaretê Karanê Zereyî rê mektûbêk erşawit û mektûba xo de waşt ke qerarê ke ameyê girewtene wa reyna bêrê erjnayene û bêrê betalkerdene.