Neslîhan Kardaş

 

MUŞ - Aktîvîsta TJA’yî Muşerref Dag derheqê mesajê Rayberê Şarê Kurdî Abdullah Ocalanî ke 8ê Adare de ame wendiş de ercnayîş kerd û vat: “Hêzê ma yê ma bi felsefeya ‘Jin jiyan azadî’ xîtabê dinya bikerê, est o. Ma cinî awankerdişê komelê aştî û demokratîkî de wayîrê rolêk muhîm ê. Ma hazirê ke berpirsyarîyê xo bîyarê ca.”

 

Rayberê Şarê Kurdî Abdullah Ocalanî badê pêvînayîşê heyetê Îmraliyî dir 27ê Sibate de vengdayîşê ‘aştî û komelê demokratîkî’ rayapêroyî rê kerdibî. Kurdistan û Tirkîya de no vengdayîş veng da û badê nê 8ê Adare Roja Cinîyan ê Dinya de mesajê Abdullah Ocalanî yê semedê cinîyan ame wendiş. Cinîyan bi eleqeyêk pîl mesaj pêşwazî kerd.

 

Aktîvîsta Têgêrayîşê Cinîyanê Azadan (TJA) Muşerref Dag derheqê babete de ercnayîş kerd.

 

‘Vengdayîşê ke ameyo kerdiş rol û mîsyonêk muhîm dano milê cinîyan ser’

 

Muşerref Dag dîyar kerd ke badê mesajê ‘Aştî û komelê demokratîkî’ 8ê Adare de bi sloganê ‘Ma hemverê qirkerdişê cinîyan de sere wedarnenê, ver bi azadî rayîr şinê’ vejîyayî meydanan. Muşerref Dag wina vat: “Ma a çarçewa de bale antî serê tarîxê 8ê Adare zî. 1857ine ra heta nika cinîyan bi bedel û têkoşînê pîlî ameyî na roje. Cinîyê kurdî bi serran o bedelan danê û ameyê na roje. Ma ewro 8ê Adare meydanan de bi mîtîngan pîroz kerd. Cinî do awankerdişê aştî û komelê demokratîkî de xebatê xo dewam bikerê.”

 

‘Berpirsyarîyêk pîl dano cinîyan’

 

Muşerref Dag dewam de wina vat: “Têkilîyê têkoşînê têgêrayîşê cinîyanê kurdan bi nêçareserîya meseleya kurdî dir est o. Nê semedî ra cinîyê kurdî  her tim wareyan de waştişê aştîye kerdî. Tirkîya û Kurdistan de cinîyan semedê pêameyê aştîye hewl dayî. Ma tîya ra persenê, şima qet cinîyê ke şer waştê vînayê? Ma her tim aştî ard ziwan. Mesajê Abdullah Ocalanî yê 8ê Adarê de zelal bî. Rolê cinîyan dîyar bî. Berpirsyarîyêk pîl keweno milê cinîyan ser.” 

 

Hêzê ma yê ke bi ‘Jin Jîyan Azadî’ veng bêro dayîş est o

 

Muerref Dag tewr peyîn wina vat: “Ganî ma xo bi jîneolojî aver berê. Qet nêbo goreyê ruhê prosesî ganî bername, perwerde pê bêrê. Perwerdeyî muhîm a, hişmendî muhîm a. Şexsê têgêrayîşê cinîyanê kurdan de ma wayîrê hêzê ke eşkenê bi felsefeya ‘jin jiyan azadî’ xîtabê dinya bikerê. Ma tu wext fek têkoşînî ra vera nêdanê. Ganî cinî xo goreyê ruhê prosesî xo rêxistin bikerê. Ganî ma kolan bi kolan tax bi taxe xo rêxistin bikerê. Ganî ma  hêzê cinî bikerê yew û paştdayîş bidê têkoşîn.”