AMED- Têgêrayişê Cinîyanê Azadan (TJA) bi munasebeta 8ê Adare deklerasyonêk da û deklerasyon de ame vatene: “Ma verba qirkerdişê cinîyan serî hawanenê û verê xo danê azadîye.”

 

Têgêrayîşê Cinîyanê Azadan (TJA) bi wesîleya çalakîyê 8ê Adare Roja Cinîyanê Kedkaran ê Dinya de eşkerayîye da çapemenîye. Kombîyayîşo ke Odaya Muhendisanê Makîneyî yê qezaya Yenîşehîrê Amedî de pê ame de pankartê "Ma hemverê qirkerdişê cinîyan de sere wedarnenê û ver bi azadîye rayîr ra şinê" ame akerdiş. Kombîyayîş de deklarasyonê kurdî hetê Hasîbe Yazdîk, yê tirkî zî hetê Aktîvîsta TJA'yî Tûlay Denîze ra ame wendiş.

 

Dewamê deklerasyonî de wina ame vatiş:

 

“Ma na 8ê Adara 2025î verba qirkerdişê cinîyan sere wedarnenê û ma 8ê Adare bi şîarê “Ma ber bi azadîye rayîr ra şinê” û bi hêrsê xo yê verba sîstemê pederşahî û bi xoverdayîşê xo de pêşwazî kenê. Xoverdayişê karkerê tekstîlî yê cinîyan; verba kedwerderîye, bi waştişê verba karê seyyewbînan, meaşo seyyewbînan dayê destpêkerdiş, ewro sebebê serewedaritişê heme cinîyanê dinya yo. No edetîya ke Clarayan ra heta Rosayan bi keda hezaran cinîyan ameyo xulqkerdene, roşnkerdişê rayîrê Têkoşînê Azadî yê Cinîyanê Kurdan dewam keno. Ma sey cinîyê kurdî nê kulturê xoverdayişî yê ameyo xulqkerdene bi ziwan, kultur û nasnameyê xo newe ra awan kerd. Ma xelekê xoverdayîşî ke Leyla Qasiman, heta Zarîfeyan, Sarayan, Sêvêyan, Arînan û bi hezaran cinîyanê kurdan awan kerdo, zêde bîyî.

Ma bi paradîgmaya xo ya demokratîke, ekolojîk û azadîwaşte ya cinîyan ke Birêz Abdullah Ocalanî sere de Rojhelato Mîyanên, pêşkêşê heme dinya kerd, ma do azadîye biqîrê. Demo ke şer, krîzê ekonomîye û qetlîyamê ser cinîyan de bi heme hetê xo dewam keno, netîceya têkoşînê şarê kurdî û hêzê demokratîke û têkoşînê seba waştişê azadîya fizîkî yê Birêz Ocalanî ame averberdene, bi Rayberê Şarê Kurdî Abdullah Ocalanî rê serdemêko newe destpê kerd.

 

Ma do cepheyê cinîyan bi hawayê tewro xurt bi rêxistin bikerê ke verba polîtîkaya şer, îşxalkerî, asîmîlasyon û tecrîdî, serkêşîya awankerdişê aştî bi rûmetî bikerê. Ma do bi ziwanê xo yê dayîke, bi kultur û cîyayê xo, cuya neweyî awan bikerê. Heta ke na cografya de aştîyêka bi rûmet awan biba, heta ke birêxistinbîyayişê ma bibo azadîya ma, hetanî ke cinîyêke û tutêke bi tena zî nêrê qetilkerdiş, ma do wareyan de bibê, heta ke ma coşê xo yê xoverdayîşê heme wareyê cuye yê komelî de vila bikerê. Ma verba qirkerdişê cinîyan sere nêdanê ro verê xo danê azadîye! Biciwîyo yewbînangirewtişê cinîyan, jin jiyan azadî.”