AYDIN- Cinîyan derheqê pêvînayîşê mabêne Rayberê PKK’yî Abdullah Ocalanî û heyetê Îmraliyî de derbas benê ercnayî û dîyar kerdî ke do şarê kurdî aştî pê bîyaro.

 

Pêvînayîşê Îmraliyî dir dewam kenê û her çar hetê dinya ra semedê aştî û çareserî xebatî dewam kenê.  Partîya Têduştî û Demorkasî (DEM Partî) zî xeylêk bajaran de pêvînayîşê ‘aştîya komelî û azadî’ pê anê û şarî dir yenê têhet. Kongreya Demokratîke ya Şaran (HDK) zî xeylêk bajaran de panelan pê ana.

 

Cinîyan derheqê prosesî de fikrê xo pare kerdî û dîyar kerdî ke şarê kurdî her tim hetê aştîye yo û bi hêvîye yo.

 

Se serre yo aştî xeyalê kurdan a

 

Mukadder Palali da zanayîş ke se serre yo xeyalê kurdan aştîye yo û wina vat: “Do şarê kurdî aştî  tesîs bikerê. Semedo ke prosesê verî ameyî astengkerdiş endîşe û tersê ma est ê. La ma bi partîya xo bawer ê. Ma do proses amade bikerê. Waştişê ma est ê. Ganî ma hemverê kayan de hişyar bê. Ez 60 serrî ya. Ma bedelê pîlî dayî. Aştî semedê ma ferz a. Şarê kurdî bi seserran o aştîye pawenê. Ganî na aştî bi destkewtişê pîlî netîce bibo. Ganî aştî semedê ameyoxê tutan bêro awankerdiş.”

 

‘Ma bêrê qetilkerdiş zî ma fek aştîye ra vera nêdanê’ 

 

Îdarekara DEM Partîye ya Koşkê Nurten Adibellî zî wina qalî kerd: “Hîn endîşe û tersî est ê. Hetêk ra  hêvî est a, heto bîn ra zî hemşaredarê ma yenê destbendkerdiş û qeyûmî yenê tayînkerdiş. Ma aştîye wazenê. La yê hemverê ma samîmî nîyê. Ma her tim aştîye wazenê. Wa dayîkî mebermê. Ma kurdî ziwanê xo wazenê.”

 

'Ganî Abdullah Ocalan bêro veradayîş'

 

Îdarekara DEM Partîye ya Aydinî Muceyla Arslan zî dîyar kerd ke ganî semedê aştîye gamî bêrê eştiş û wina vat: “Şar hetê aştîye yo. Ma hetê aştîyêke yê ke ziwan û heqê Kurdan ameyê dayîşî yo. Ma hetê aştîye yê. Bi taybetî ma cinî azadîye wazenê. Ganî Abdullah ocalan bêro veradayîş. Ma tedayan dir rî bi rî yê. Qeyûmî yenê tayînkerdiş. Ma çareserî wazenê.”