AMED - “Mîtîngê Azadîye” ke Meydanê Îstasyonî de ame organîzekerdiş, bi beşdarîya bi seyan kesî dest pêkerd. Girseyo ke meydan de kom bî, xeylêk rey bi sloganê "Bijî Serok Apo" waştişê azadîya fîzîkî ya Rayberê PKK'yî Abdullah Ocalan kerd.

 

Partîya Têduştî û Demokrasî (DEM Partî) Meydanê Îstasyonî yê Amedî de "Mîtîngê Azadîye" organîze kerd. Kesê ke vernîya destpêkerdişê mîtîngî ameyî ware, cigêrayîşî ra ameyî derbazkerdiş. Vernîya ke mîtîng dest pêbikero, ware pirr bî û xeylêk kesî verê berê cigêrayîşî de vindertî. Pêwa cinîyê bi cil û belgê xo yê neteweyî beşdarî mîtîngî bîyî, zêdebîyayîşê ciwanan ê wareyî bale ant. Meydan de pankartê bi sloganê "Bila sedsala nû bibe sedsala azadiyê" û "Ji aştiyê re azadî" ameyî daliqnayîş.

 

Meydan de bêmabêne sloganê, "Bijî Serok Apo", "Bê Serok Jiyan Nabe" û "Jin jiyan azadî" ameyî berzkerdiş.

 

Bernameyê mîtîngî

 

Hemsereka Pêroyî ya Partîya Herêmanê Demokratîke (DBP) Çîgdem Kiliçgun Uçar, Hemserekê Pêroyî yê DEM  Partî Tuncer Bakirhan, Aktîvîsta Têgêrayîşê Cinîyanê Azadan (TJA) Çaglar Demîrel û Dayîkê Aştîye do sey qiseykerdoxî beşdarê mîtîngî bibê.

 

Badê qiseykerdişan, do Kolektîfê Ritmê Azadî vejîyê sehne.