Rabîa Onver

 

WAN- Yew avûkata Merkezê Heqê Cinîyan ê Baroyê  Wanî Zeynep Demîr merdişê bişik ê wendekara unîversîteye Rojîn Kabaîş ercna û vat, dozgero ke newe tayînê dosya bîyo, averşîyayîşêk bi hêvî dosya de yo û vat, do heta peynî semedê dosyaya Rojîn Kabaîşe têkoşîn bikerê.

 

Wendekara unîversîteya Yuzuncu Yilî Rojîn Kabaîşa 21 serrî ke bişik dinyaya xo bedelnaye, 114 rojî mergê aye ser o derbaz bî û hema babete nêameya roşnkerdiş. Qeraro nimite yê dosya ser o dewam keno û selahîyetdarî persan ra çim û goşê xo pada yo. Tewr peyîn dozgerê diyîn tayînê dosyaya Rojîn Kabaîşe ame kerdiş.

 

Yew avûkata Merkezê Heqê Cinîyan ê Baroyê Wanî Zeynep Demîr derheqê dosya de qisey kerd.

 

‘Mergê Rojîn Kabaîşe bişik o’

 

Zeynep Demîr wina qalê prosesî kerd: “Dewaya Rojîn Kabaiş zî mergê bişik ê cinîyêke ya. Ma vînenê ke dosya de fehmê întîxarî ser o vindertê. Kitabo ke Rojîne sey wendoxe mojnayê û dosya de bi ca kerdê, bi aşman verê kitabxane ra ameyo girewtiş. Bi nê wazenê vajê ke sey Rojîne întîxar kerda. Ma vînenê ke nê nêzdîbîyayîşê rastî nîyê û ê semedê hîn cigêrayîşê Google yenê serwîskerdiş. Ma hemverê awankerdişê fehmê winasî vejîyayî ke kam ci tarîx de, kam ci prosesî û senî nê cigêrayîşê Google ameyê bidestkerdiş de çin ê yê.”

 

‘Ma tayînkerdişê dozgerêk newe pozîtîf vînenê’

 

Zeynep Demîr dîyar kerd ke dosya avûkatan rê nimite yena kerdiş û wina vat: “Nika dozgerêk newe ame tayînkerdiş û na netîceya reaksîyonanê ma de ame tayînkerdiş. No hêvî dano ma û ma sey averşîyayîşêk pozîtîf vînenê. Badê mergê Rojîn Kabaîşe her kesî vat, ganî hîna xesas nêzdîyê wendekaran bibê. Tena semedê Rojîne nê, semedê pêro wendekaran tehluke est o. Tîya de hukmê pawitiş û tedbîran vejîyenê werte. Peymana Stenbolî dir wezîfeyê dewlete rê bar benê, est ê.”

 

‘Vatişê întîxar kerda hemverê huqûqî yo’

 

Zeynep Demîr dîyar kerd ke destpêkê dosya de vatî Rojîn Kabaîş întîxar kerda û heta ke delîl çin bê merdim vajê întîxar yan zî cînayet raşt nîyo û wina vat: “Raşt nîyo ke ma vajê întîxar o yan zî cînayet o. Semedo ke cigêrayîş bêro kerdiş. Badê pêro kêmî ameyî tespîtkerdiş, do hetê huqûqî de raşt bê. Vatişê întîxarî hemverê huqûqî yo. Kêmî dosya de ameyî ercnayîş. Dozgerê newe ra ame tayînkerdiş. Proses do hîna bi tesîr bêro kerdiş.”

 

‘Ma do taqîbkerdoxê dewa bibê’

 

Zeynep Demîr wina qedêna: “Na sewîya de ma merkezê Heqê Merdiman ê Cinîyan ê Baroyê Wanî û rêxistinê cinîyanê Wanî dosya taqîb kenê û ma do taqîbkerdoxê prosesî bibê. Heta ke semedê Rojîn Kabaîş edalet pê bêro, ma do têkoşînê xo dewam bikerê.”