Elfazî Toral

 

STENBOL- Cinîyan derheqê mesajê ke Rayberê PKK’yî Abdullah Ocalanî şirawito û meclîs mojnayo de ercnayîş kerd û vat: “Meselaya kurdî, problemê welatî yo. Pey berê padeyeyî pêvînayîş nînê qebûlkerdiş. Ganî her çî zemînê qanûnî de TBMM’yî de bêro averşîyayîş.”

 

Heyetê Partîya Têduştî û Demokrasî (DEM Partî) yê Îmraliyî Pervîn Buldan û Sirri Sureya Onder 28’ê Kanûne de Rayberê PKK’yî Abdullah Ocalan dir pêvînayîş kerd û badê pêvînayîşî mesajê 7 maddeyê pê ameyîne bi rayaumûmî rê ame parekerdiş. Rayberê PKKyî mesajo şirawit de dîyar kerd ke xurtkerdişê yewîya şarê kurd-tirkan de berpirsyarîyêk tarîxî yo û semedê serkewtişê prosesî ganî pêro kesî însiyatîfî bigîrê û zemînê nê zî TBMM’yî mojna. Cinîyan derheqê babete de ercnayîş kerdî. 

 

Endama Kordînasyonê Cinîyan ê HDP’yî Yagmur Yurtsever da zanayîş ke prosesê çareserîya 2013-2015 ra heta nika Kurdistan û Tirkîya hêrişê cidî babeta vatişî yê û vat: “Semedê çareserîya demokratîke ya meseleya kurdî û demokratîkbîyayîşê Tirkîya dîyalog muhîm o. Semedû nê ganî hêrişî bêrê vindarnayîş. Tewr zêde cinî aştî û demokrasî wazenê. Ma cinî demokratîkbîyayîşê Tirkîya de xo berpirsîyar vînenê. Ganî no sey îmkan bêro ercnayîş."

 

‘Ganî her çî zemînê qanûnî de bêro averşîyayîş’

 

Verfeka Partîya Çepî ya Keskan ya Bakirkoyî Oya Uçar zî wina vat: “Mexdûrê şerî cinî û tut ê. Semedê meselaya kurdî heta nika nêameya çareserkerdiş zirarêk pîl virazîya. Ez kampanya îmzayan ê mîlyonêk yê HDK’yî bi erc vînena. Mîlyonêk nê ganî bireso 10 mîlyonî. O wext ma do bivînê ke hêvî est a. Şerî ra xelisyayîş do aramî bîyaro. Ganî her çî zelal bêro kerdiş. Şar zano çi wazeno. Şar zelalî wazeno. Ganî her çî zemînê qanûnî de aver şêro.”

 

‘Ganî her kes rolê xo kay bikero’

 

Endama Meclîsê Pêroyî ya HDK’yî Esengul Demîr zî dîyar kerd ke babeta demokratîkbîyayîşê Tirkîya babeta esasî ya û wina vat: “Abdullah Ocalanî wezîfeyê xo ard ca. Ganî mesajê ey esas bêrê girewtiş. Ganî nê îmkanî baş bêrê ercnayîş. Ma şahidîyê prosesê verî kerd. Coka nika rayaumûmî bi mereq û baldarî proses taqîb kena. La ganî tena bi taqîbkerdişê sînor nêmanê. Ganî her kes wezîfeyê xo ca bîyaro û tewrê prosesî bibê. Ganî waştişê şarî verê çiman de bêro girewtiş. No proses bi hêvî. Ma zî bivînê kerdoxê dîyarker yê prosesî.”

 

‘Aştî lazimîyêke lezgîn a’

 

Kordînasyona Pêroyî ya Partîya Sosyalîst (SOLDEP) Doga Teknecî zî wina vat: “Aştî na noqta de lazimêke pîl a. Pêvînayîşê Îmraliyî zaf muhîm ê. Semedê têduştîya kurd–tirkan ganî gamî bêrê eştiş. Ma nê pawenê. O yo ke paştdayîş bido aştî TBMM yo. Birêz ocalan kurdan temsîl keno û lîderêk muhîm o. Bêşik ganî serê maseyêke de bêrê têhet. Ganî ma cinî semedê aştîye, kapîtalîzîmê pederşahî birijnê. Ganî semedê aştî pêro gamî bêrê eştiş.”