Elfazî Toral

 

STENBOL- Komîsyonê Semedê Gulîsan Doku Edalet, Hîvda Selen derheqê merdişê bişik ê Rojîn Kabaîş de qisey kerd û vat: “Hewce bikero ma do standan awan bikerê û yew bi yew her kesî ra vajê ke Rojînê întîxar nêkerda. Amanc o yo ke ma bi têkoşîn vejê werte ke çi bi Rojîne bîyo.” 

 

Hîvda Selen sewbîna vat, semedê Rojîn Kabîş Komîsyonê Edeletî awan kerdê û venga her kesî kerd ke dorê komîsyonî de bêrê têhet. 

 

Wendekara Unîversîteya Yuzuncu Yil (YYU) ya Wanî Rojîn Kabaîş 27’ê êlule 2024. de vînî bîbî û cenazeya aye 18 rojî badê qerax de ameye vînayîş. Semedê merdişê bêşik ê Rojîne roşn bibo, her cayê Kurdistanî û Tirkîya de çalakî dewam kenê. Komîsyonê Semedê  Gulîstan Doku Edalet ê Stenbolî, Hîvda Selen derheqê babete de qisey kerd û vat, do semedê cinîyê ke bişik dinyaya xo bedelnayî, têkoşînê xo berz bikerê.

 

Hîvda Selen da zanayîş ke Gulîstan Doku 5’ê çeleyê 2020. de Dêrsim de ameya vînîkerdiş û vernîya ke vînî bibo Gulîsane bi şikdar Zaynal Abarakov bîya. Hîvda Selen wina vat: “Waliyê Dêrsimî Tuncay Sonel keyeyî ra vat, Gulîstane întîxar kerda. Verê rayaumûmî dayî awbendê Uzun Çayirî. Ma bi dîmenê pisporan tespît kerd ke Gulîstane întîxar nêkerda. La pêwa nê şikdar nêame muhakemekerdiş.”

 

‘Ma do semedê pêro cinîyan têkoşîn bikerê’

 

Hîvda Selen wina dewam kerd: “28’ê gulana 2018. de Şule Çet hetê şikdar Berk Akand û Çagatay Aksu ra qatê 20. ê plazeyêk ra eştî war. Ma têkoşînê edaletî yê semedê Şule Çet û Gulîstan Doku dayê destpêkerdiş, dewam kenê. Semedê şikdarê Şule Çet ceza bigîro, ma têkoşîn da û netîce girewt. Ma semedê Gulîstan Doku zî têkoşîn kerd, badê ma tespît kerd ke întîxar nêkerda. Nika ma semedê pêro cinîyanê bi şik dinyaya xo bedelnayî, têkoşîn kenê.”

 

‘Ma do hesabê Rojîn Kabaîş bipersê’

 

Hîvda Selen bale ant merdişê bişik ê Rojîn Kabaîş ser o û wina vat: “Nika ma semedê Rojîn Kabaîş têkoşînê edaletî kenê. Mergê aye întîxar nîyo. Na cografya de camêrdî cinîyan qetil kenê. Dewlete vejena vana ke întîxar o. Cuya cinîyan çin yena hesibnayîş. No hukmê camêrdî yo. Ma nê qebûl nêkenê. Têkoşînê ma semedê Şule Çet û Gulîstan Doku dayo ma semedê Rojîne zî danê. Ma do keyeyê  aye dir bibê vengê Rojîne. Ma semedê Rojîn Kabaîş ‘Komîsyonê Edaletî’ awan kerd. Ma do dewaya Rojîne taqîb bikerê. Ma do bajaran de çalakîya pê bîyarê. Ma do standan awan bikerê û hewce bikero ma do nê çî her kesî rê qal bikerê ke Rojîn Kabaîş întîxar nêkerda. Ma wazenê her kes wayîrê dosyaya Rojîne vejîyo û dorp komîsyonê edaletî yê semedê Rojîne ameyo awankerdiş, bêrê têhet.”