Arjîn Yuksekbag

 

ANQARA - Hemsereka ÎHDyî Nuray Çevîrmen da zanayîş ke zîndanê Tirkîya agêrayê merkezê îşkence û binpaykerdişê heqan.

 

Binpaykerdişê heqan yê zîndanan dewam kenê û selahîyetdaran derheqê babete de tu game nêeşta. Pêwa ke rewşa tepişteyanê nêweşan xeylêk rey ameya rojeve zî hema binpaykerdişê heqî yenê ciwîyayîş. Hemsereka Komeleya Heqê Merdiman (ÎHD) ya Anqarayî Nuray Çevîrmen derheqê binpaykerdişê heqan ê ke bi rayîrê mektuba tepişteya Selver Yildirime de ameye de ercnayîş kerd.

 

‘Problemê kronîkî benê sebebê binpaykerdişî’

 

Nuray Çevîrmen  da zanayîş ke zîndanan de binpaykerdişê heqan yenê ciwîyayîş û vat: “Problemê pîlî yê tepişteyan hetê heqî de est ê. Bêşik heqê cuye, heqê weşîye yeno binpaykerdiş. Problemê ke tepişteyî ciwîyenê zaf hetin ê. Sewqkerdişê nêweşxaneyan bigîre, heta dergkerdişê demê sewqkerdişî, vetişê revîran bi aşman dima, peydakerdişê dermanan û problemê xidayan o. Xeylêk problemî est ê. Problemê ke nînê  dermankerdiş, badê demêk kronîk benê û no zî heqê cuye binpay keno.”

 

‘Tepişteyî wexto ke şinê nêweşxane probleman ciwîyenê’

 

Nuray Çevîrmen dewam de vat: “Heqê weşîye yeno binpaykerdiş. Dermankerdişê bi kelepçe û wesayîtê rîngî sey hacetê îşkenceyî yê. Nê semedî ra tepişteyî nêwazenê şêrê nêweşxaneyan. Tepişteyê nêweşî bi saetan wesayîtê rîngî yê sey qutî de yenê vindarnayîş.”

 

‘Semedê muracatan cewab nîno dayîş’

 

Nuray Çevîrmen dyar kerd xeylê bêhuqûqî benê û vat: “Ma xebere girewte ke doktorî bi sebebê asayîşî kelepçe nêvejenê. Na babete de xebatê derheqê perwerdekerdişê na babete yê Yewîya Tabîbanê Tirkan estbî. La ma netîceyan ra ewnîyenê ke hetê hekîman ra no zêde esas nêameyo girewtiş. Sîstemo ke heqê weşîye werte ra wedarnayo ameyo awankerdiş.”

 

Xeylêk rey bê dermankerdişî agêrenê

 

Nuray Çevîrmene bale ant nêweşan ser û vat: “Selver Yildirim tepişteya nêweş a û çimanê aye de problemê cidî est ê. Nêweşxaneyê bajarî de semedê dermankerdişê bi kelepçe red kena û nêwazena bi rîng şêro, agêrena zîndan. Xeylêk problemê bi nê rengî yê tepişteyan est ê. Ganî nê binpaykerdişî verê çiman de bêrê girewtiş. Wezîfe keweno wezaretê weşîye, edalet û karê zereyî ser. Ganî ma bi vengêk hempar ma zî hemverê nê binpaykerdişê heqan têkoşîn bikerê.”