Rozerîn Gultekîn

 

STENBOL - Karkera şaredarîye Belgîn Taş bi endamê meclîsî Ozkan Ozdemîr ke waştêne rayîr ver bi grevî bigîro de munaqeşe kerd û bi KODê 26î kar ra ameye eştiş. Belgîn Taş badê nê verê şaredarîye de dest bi xoverdayîşî kerd û dîyar kerd ke çîyê ke ameyê ciwîyayîş vernîya feqîrî akeno û vat: “Semedo ke CHP yo her kes ker û lal o. Ez semedê nê têkoşînê bi rumet paştdayîş wazena.”

 

Bi serran o xebatkarê şaredarîye bi kodê cîya bê tazmînat kar ra yenê eştiş. Serewedaritişê karkeran hemverê çinkerdişê kede dewam keno. Belgîn Taş ke şaredarîya Kartalî de şuxilyayîne bi KOD 26î kar ra ameye eştiş. Pêvînayîşê Peymana Komî ya ê Karî yê Şaredarîya Kartalî de semedê pêkerdiş nêbî, grev ame destpêkerdiş. Badê nê Belgîn Taş 18ê teşrîna peyêne de verê şaredarîye de dest bi grev kerd. Belgîn Taş derheqê proseso ke ameyo ciwîyayîş de  ajansê ma rê qisey kerd.

 

Bi îfadeyê endamê meclîsî kar ra ameye eştiş

 

Belgîn Taş da zanayîş ke 2014ine ra şaredarîye de şuxilêna û 5 serrî yo zî Mudûrîya Hetkarîya Komelî ya şaredarîye de şuxilêna û wina vat: “Prosesê grevî de karkerê şaredarîya Beykozî çop arêdayîne. Grevê ma dewam kerdêne. Ma vat no raşt nîyo. Înan zî vat, ma talîmat girewto, ma wezîfeyê xo kenê. Munaqeşe vejîya. Ozkan Ozdemîr ra mi vat, ti endamê meclîsî yê. Mi ra vat; ti şaredarî ra nan wane û nankorî kena. Camêrdan dorê ma girewt. Badê mi fam kerd ke kesê ke çop arêdanê, bi amancê pawitişî vejîyayê arêdayîşê çopî. 3yê teşrîna peyêne de hedîse ameye ciwîyayîş. 4ê teşrîna peyêne de ez kar ra ameya eştiş. Ozkan Ozdemîr 18 teşrîna peyêne de derheqê mi de gerre kerdo.”

 

‘Semedo ke CHP mîyan de yo her kes ker û lal o’

 

Belgîn Taş wina dewam kerd: “Bi KODan merdimî asanî vejenê. Çîyê ke ameyî ciwîyayîş eynî wextî de hêrişêk cinsperestî yê. Vernê de feqîrîya cinî û hepskerdişê cinîyan akenê. Şima nêeşkenê heqê min ê 11 serrî xesp bikerê. Ez tena ya. Sendîka çin a, karkerî kîşte mi de nîyê. Sendîka hewn de ya. Hêvîdar a aya bibê. Her kes ker û lal o. Semedo ke CHP mîyan de yo her kes ker û lal o.”

 

‘Ez paştdayîş wazena’

 

Belgîn Taş da zanayîş ke badê ke kar ra ameya eştiş heqê xo pawit a û vat: “Na dewa, dewaya heqan a. Dewa nanî wina dewayêka her kes eşkeno paştdayîş bido. Ez semedê nê têkoşînê bi rûmet paştdayîş wazena. Ez wazena ke ê xo ver bidê. Ez wazena ke  karkerî hêzê xo nas bikerê. O yo ke rizq dano Homa yo. Tu feydeyê tersî çin o. Çîyêk nêame sereyê  Belgîn Taş, çîyêk bi înan zî nîno.”