WAN - Rojnamegerê cinî reaksîyon vera qetilkerdişê rojnameger Nazim Daştan û Cîhan Bîlgîne yê ke rayîrê mabêne Awbendê Tişrîn û bajarokê Sirîn de xeberan taqîb kerdêne hetê SÎHAyê Tirkîya ra ameyî  qetilkerdiş, mojnayî û vatî: “Semedê hevalê ma yê şehîd Nazim û şehîd Cîhan Bîlgîne sozê ma o yo ke ma do nê têkoşînî heta peynî dewam bikerê.”

 

Vakur û Rojhelatê Sûrîye û Herêma Federalî ya Kurdistanî di 5 serrê peyînî de tewr tay 13 rojnamegerî ameyî qetilkerdiş û 7 zî birîndar bîyî. 19ê Kanûne de rojnamegere Cîhan Bîlgîn û Nazîm Daştan ke averşîyayîşê Vakur û Rojhelatê Sûrîye taqîb kerdêne, netîceya hêrişê SÎHAyê dewleta tirkan de dinyaya xo bedelnayî. Cîhan Bîlgîn û Nazim Daştan yewin rojnamegerê ke Vakur û Rojhelatê Sûrîye de bîyê hedef nîyê.

 

‘Hewl dayî sazgehanê ma û meslega ma krîmînalîze bikerê’

 

Rojnamegere Rûken Polat dîyar kerd ke ê têkoşînê çapemenîya azade de taqîbkerdoxê Mûsa Anter û Gurbetellî Ersoze yê û vat: “Armanca sereyîn yê têkoşînê heqîqetî, resnayîşê heqîqetî yê rayaumûmî rê yo û nuştişê heqîqetî yo. Roja ewilî ra teda xebatkaranê çapemenîya azade rê yeno kerdiş. Rojnamegerî bîyî hedef, hevalî herêman de ameyî destbendkerdiş tehdîd û îşkence înan rê ame kerdiş. Meslegê ma û sazgehê ke ma pê nê girêdayeyê, hewl ame dayîş ke bêrê krîmînalîzekerdiş. Ancî xeberê ma hetê hukmat û medya ra kerdî hedef, ma ameyî tepiştiş û kiştiş.”

 

‘Şarê kurdî hevalanê ma nas kenê’

 

Rûken Polat da zanayîş ke badê Gulistan Tara û Hêro Bahaddîn, tewr peyîn zî Nazim  Daştan û Cîhan Bîlgîn ameyî qetilkerdiş. Rûken Polat wina dewam kerd: “Ma nê hêrişan şermezar kenê. Ma do têkoşînê hevalanê xo pîl bikerê. Çapemenîya terefgire vîdeoyê ke hevalê ma amebî qetilkerdiş weşan kerdî û hewl dayî ke meslegê înan krîmînalîze bikerê û sey ke bi nasnameyêk bîn uca şuxilênê mojnayî. Rojnameger û keyeyê vejîyayî kuçeyan ke nê şermezar bikerê, tedayan dir ameyî rî bi rî. Stenbol de bi sebebê hevalê ma fotografanê hevalanê ma yê şehîdan wedarnayî, ameyî tepiştiş. Ma do heta peynî têkoşînê hevalanê xo taqîb bikerê. Ma taqîbkerdoxê înan ê. Ma fo hemverê tedayan sere nêtewênê û têkoşînê xo xurt bikerê.”

 

‘Ma sere nêtêwênenê’

 

Rojnameger Ozlem Yacan zî wina vat:: “Çapemenîya azade her tim bi kuyayîş, destbendkerdiş û qetilkerdişê kesê ke wazenê raştîyan biniminê dir yenê rî bi rî. Hewl danê ke bi tepiştişê rojnamegeran nênusê la ma do tu wext sereyê xo nêtewênê. Ma do nuştişê rastî dewam bikerê. 2 hevalê ma yê ke Rojawan de raştî nuştî ameyî qetilkerdiş. Xeberê ke hevalê ma uca dayî, bêhuqûqîyê ke uca ameyê kerdiş, bi temamî eşkera kerdêne. Ma do bi destkerdişî têkoşîn û qelema Nazim û Cîhane ya bêpeynîye dewam bikerê. Ma do têkoşînê hevalanê xo heta peynî dewam bikerê.”