Arjîn Yuksekbag 

 

ANQARA - Keyeyê tepişteyan bale antî rewşa weşîya tepişteyê nêweşî Rihan Kavak Ozbek û Selver Yildirim ser o û vatî: "Bi tehrîkan hêrişê rûmetê tepişteyan kenê û tedawîya înan bi nê rengî asteng kenê. Heqê tepişteyan ê cuye gênê û înan terkê mergî kenê."

 

Keyeyê 2 tepişteyê nêweşî yê Selver Yildirim û Rihan Kavak Ozbek yê ke Zîndanê Cinîyan ê Sîncanî de binpaykerdişê heqan ê tewr giran yeno kerdiş de manenê, venga selahîyetdaran kerdî.

 

'Semedê cuye têkoşîn kenê'

 

Tepişteya nêweşa girane Selver Yildirim ke serra 1999ine de ameye tepiştiş û cezaya muebetî aye rê ameye birnayîş, zîndan de problemanê giranan yê weşîye dir têkoşînê cuye dana. Selver Yildirim wexto ke teber de bîye, çimê aye rastî kor bî û semedo ke kewte zîndan û dermankerdişê çimê xo yê çepî zî nêkerd, çimê aye se ra 10 kêm vîneno. Nê semedî ra zî bi tena sereyê xo nêeşkena lazimîyê xo yê bingehîn pê bîyaro. Pêwa ke mîyanê 25 serranê peyîn xeylêk zîndanê ke aye semedê dermankerdişî sewqî bîya zî semedo ke nêweşîya aye resaya sewîyeyêka giran, aseno ke heta nika averşîyayîş nêvirazîya yo.

 

'Nêeşkena bi tena sereyê xo cuya rojane dewam bikero'

 

Waya Selvere derheqê rewşa weşîya waya xo de wina vat: “Semedê problemê weşîye mecbûr mende ke semedê dermankerdişî şêro xeylêk zîndanan. La waya mi semedê sebebê cîya nêameye dermankerdiş. Nê 25 serran de ameye a sewîya ke çimê aye temamî kor bibê. Nika çimêke aye kor bîyo û semedê dermankerdişêk baş nêbî, çimê aye ke vîneno zî wareyê vînayîşî de kêmî bîyo. Nê semedî ra rewşa waya mi lazimîyê xo bi tena sereyê xo bîyaro nêeşkena. Bê hetkarîya hevalanê xo û kesêk bîn çinî bibo, cuya xo ya rojane nêeşkena dewam bikero."

 

Vengdayîşê veradayîşî 

 

Rojda Yildirim, dîyar kerd ke ganî Selver Yildirim semedê problemê cidî yê weşîye zîndan de nêmano û vat: “Ma eynî vengdayîşî tena semedê waya xo nêkenê, semedê pêro tepişteyanê nêweşan kenê. Waştişê ma o yo ke nê wareyî de tewr lez hadreyî bêrê kerdiş, tepişteyê nêweşî bêrê veradayîş û şert û mercê dermankerdişî bêrê peydakerdiş."  

 

Warezaya tepişteya nêweşe Rihan Kavak Ozbek ke Zîndanê Girewte yê Cinîyan ê Sîncanî de manena Tuba Demîr, bale ant problemê weşîye yê xale xo ser û bale ant binpaykerdişê heqan ser. Tuba Demîre venga selahîyetdaran kerd ke vengê înan bieşnawê û waştişê înan bica bîyarê. 

 

Doktor waşt ke bi kelepçe muayeneye bikero'

 

Tûba Demîr, ard ziwan ke xala aye 3ê Adara 2016ine ra tepişte ya û xeylêk problemê weşîye dir rî bi rî menda û vat: "Xala min a ke vernîya prosesê zîndanî de hende nêweşî aye dir çinî bî, nika semedê şert û mercê zîndanî bi xeylêk nêweşîyan dir têkoşîn kena. 11ê teşrîna verêne de aye wedarnayî Nêweşxaneyê Bajarî Etlîkî yê Anqarayî, semedê netîceya testê ke vernîya kolonoskopî amebî kerdiş û kolonoskopîyê aye bêro antiş, xala mi zî doktorî ra waşta ke kelepçeyê aye bêrê akerdiş la doktorî vat, hewce çin o ke kelepçe bêrê akerdiş. Hemverê na rewşe de xala mi dîyar kerd ke na rewşe goreyê rûmetê merdiman nîya û vernîya ke agahîyêke netîceya testî ra bigîro odaya xo ra vejîya.”

 

'Şert û mercê giranî de yena tepiştiş û ganî bêro veradayîş'

 

Tuba Demîr, dîyar kerd ke ganî pêro tepişteyê nêweşî bêrê veradayîş û vat: “Xala min a ke semedê mamografî wedarnayî nêweşxane, semedo ke destûr nêda leşker milê aye bigîrê, bêdermankerdişî agêrenê zîndan. Xala mi dir xeylê nêweşî est ê la şert û mercê giran de yena tepiştiş. Ganî lezkî serbest vera bidê û ma wazenê bi însanî û bi wijdanî nêzdîyê nê problemî bibê."