AMED - Derheqê muxabîra ajansê ma Oznur Deger de, seba ke hemverê vateyanê cînsîyetperest ê  polîsan reaksîyon nîşan da, cipersayîş ame destpêkerdiş.

 

Oznur Degera ke seba tazîyeya rojnamegerê ke Rojawayê Kurdîstanî de Cîhan Bîlgîn û Nazim Daştanî hetê SÎHAyanê dewleta tirkan ameyê kiştiş şîbî Mêrdîn, maruzê vateyanê polîsan ê cînsîyetperest bîye û reaksîyon nîşan da, derheqê aye de cipersayîş ame destpêkerdiş.

 

Walîtîya Mardînî, seba ke Oznur Degere hemverê heqeretan reaksîyon mojna, bi îddîaya “Heqeretê xebatkarê umûmîye” tehqîqat da destpêkerdiş. Ame musnayene ke Oznur Degere hesabanê xo yê medyaya dîjîtale ser o hetê kesanê ke nasnameyê înan eşkera nîyo yena tehdîtkerdiş û yena hedefgirewtiş.

 

MGKyî ra hemverê tehqîqatî de reaksîyon

 

Komela Rojnamegeranê Cinîyan a Mezopotamyayî (MKG) derheqê babete de beyanatêk da û wina vat: “Sîstemêko vateyanê cînsîyetperestan paweno la rojnamegeran bi ceza keno, ma qebul nêkenê. Ma hevalanê xo het de yê.”