Nazlican Nûjîn Yildiz

 

ÎZMÎR - Cinîyan reaksîyon vera tayînkerdişê qeyûman mojnayî û dîyar kerdî ke îqtîdar eşkerayîyê derheqê prosesê çareserî de samimî nîyo û vatî, bi tayînkerdişê qeyûman nakokîyê înan ê eşkerayîyan vejîyeno werte. Cinîyan dîyar kerd ke ganî şar wayîrê îradeyê xo vejîyo û bi tewrbîyayîşê şarî do her tewir problemê welatî bêrê çareserkerdiş.

 

Cinîyan dîyar kerd ke ê polîtîkaya qeyûmî qebûl nêkenê û dîyar kerdî ke îqtîdar hemverê şarê kurdî de samîmî nîyo û bi tayînkerdişê qeyûman nê mojnenê û do hemverê hewldayîşê pelçiqnayîşî û tersnayîşî yê îqtîdarî têkoşînê xo dewam bikerê.

 

‘Rewşa şerêk taybetî est o’

 

Hemsereka Komeleya Elewîyan ê Demokratîke (DAD) Nebahat Çelîk wina qal kerd: “Bi qeyûman vanê ke ‘ma şima nas nêkenê’. Îqtîdar îradeyê cinîyan û şarê kurdî nas nêkero zî cinî û şarê kurdî îradeyê xo nas kenê. Bahçelî vatişêk eşt werte. No kêmî bo zî merdiman rê hêvîyêke viraşt. La heto bîn ra zî îradeyê kurdan nas nêkenê. No nakokî yo. Wazenê ke Kurdan pasîfîze bikerê. Şarê kurdî xora îradeyê xo zano. Hîrê demî yo cewabê ci dano. Pey îradeyê xo de yo. Xoverdayîşêk est o. Qeyûman qebûl nêkenê. Werte de rewşa şerêk taybetî est o. Heto bîn ra zî qalê çareserî kenê.”

 

‘Bi qeyûman wazenê hawirê kaosî awan bikerê’

 

Endama Sendîkayê Kedkarê Perwerdeyî û Zanistî (Egîtîm-Sen) Gulcan Hanligîl zî wina vat: “Netîceya qeyûmî dewam bikerê, do welat de xeylêk çî bivuryê. Bi qeyûman wazenê hawirê kaosî awan bikerê. Eşkerayîya Bahçelî samîmî nîya. Badê nê qeyûmî ameyî tayînkerdiş. Hem vanê çareserî, hem qeyûman tayîn kenê. Tu samîmîyetê nê çin o.”

 

‘Hukmatêk ma çin hesibneno est o’

 

Endama Meclîsê Cinîyan ê DADê Îzmîrî Elîf Hurustan zî wina vat: “Qeyûm tena tayînê şaredarîyan nêbenê, tayînê îradeyê şarî zî benê. Heqê weçînayîşî çira yeno şuxilnayîş. No îradeyê ma yo. Îradeyê ma ame xespkerdiş. Ma qebûl nêkenê. Ma qeyûman red kenê. Hukmatêk ke ma çin hesibneno est o. Ma aştî û aramî wazenê la ê nêçareserî de biisrar ê.”