Rabîa Onver 

 

WAN - Parlamentera DEM Partî Oznur Bartin dîyar kerd cayê cîya yê bedenê tepişteya nêweşe Rojda Tokçu ke zîndanê Tîpê Tyê Ereglî yê Konya de tepişte ya, birînê kûrî virazîyayê û wina vat: “Personelan pîya deyîra ‘Olurum Turkîye’ vatê û hewl dayê ke Rojda provake bikerê. Zîndanî açaryayê îşkencexaneyan. Ganî wezaretê edaletî hemverê na bêvengîya xo xira bikero.”

 

‘Ganî bêro dermankerdiş’

 

Oznure da zanayîş ke Rojda 8 serrî tepişte ya û bedenê aye de birînê kurî abîyê û wina vat: “Tepişteyêke cinî kîşte Rojda de eynî qawişe de mendêne. La do aye neqlê zîndanêk bîn bêro kerdiş. Dimayê ke aye şêro do Rojda tena bimano. Rojda 8 serrî yo tepişte ya. Nêeşkena tena biewno xo ra. Ganî yew kîşte aye de bo. Tenêmendişê aye rîsk o.”

 

‘Tepişteyê nêweşan terkê mergî kenê’

 

Oznure dîyar kerd ke zîndanan de bi seyan tepişteyê sîyasî est ê û wina vat: “Rewşa tepişteyanê nêweşan qet baş nîya. Huqûq yeno binpaykerdiş. Nêweşî terkê mergî yenê kerdiş. Zîndano ke Rojda zî ci de ya, caardişê keyfî û îdeolojîkî est ê. Bi taybetî wextê cipersayîşê dîsîplînî de nêverdenê pawitiş bêro kerdiş. Sewbîna Personelan pîya deyîra ‘Olurum Turkîye’ vatê û hewl dayê ke Rojda provake bikerê. Rojda 10 aşmî yo zîndan de problemê giran ciwîyena.”

 

‘Rojda nîna dermankerdiş’

 

Oznure wina dewam kerd: “Dermankerdişê aye bi rêk û pêk nîno kerdiş. Sewqê nêweşxane nîna kerdiş. Xeylêk reyan ame waştiş ke sewqê zîndanê Kandira yan zî Gebze bêro kerdiş. La ame redkerdiş. Zîndanî açaryayê îşkencexaneyan. Tepişteyê nêweşî nînê dermankerdiş û tahliyekerdiş. Ganî semedê tepişteyan kar û barê qanûnî yê lazimî bêrê kerdiş.”

 

Oznure tewr peyîn dîyar kerd ke do wextêk nêzdî de şêro serdayîşê Rojda û eynî wextî de rewşa Rojda berdê meclîs û pêşnîyazî daya serekîya meclîsî.