Berîtan Canozer

 

DÊRSIM - Wendekara Unîversîteye Gulîstan Dokuye 58 rojî yo ke vindî ya. Embaza aye Cansu Oztane dîyar kerde ke hema zanayîş aye ra nêgirewtê û va, aye bawer nêkane ke Gulîstane întîxar kerda û va: “Cigêrayîşî qels ê. Xebatêka baş çin a.” 

 

Wendekara sinifa 2în ê Unîversîteya Munzurî Gulîstan Dokuye 58 rojî yo vindî ya. Her çiqas vajo xebatî yenê dewam kenê zî reaksîyonê vera xebatan estê. Heto bîn ra zî keyeyê Gulîstane bendewarîyê xo yê bajarî dewam kenê. Hema hema her roje keyeyî şinê Pira Dînarî û bi omidê ke zanayîşêko bigîrê pawenê.

 

Cansu Oztanya aye ke bi Gulîstanî dir eynî beşî wanena û embaza ci mektebe û odaya aye ya, derheqê Gulîstane de qisey kerde. Cansuye va, wexto ke newe dest bi mektebî kerda Gulîstane nas kerda û va, Gulîstane karekterêka ameyne heskerdene, bi kelecan bî û cuye ra hez kerdêne. Cansuye wina va: “Têkilîyê aye bi embazan dir zaf baş bi. Xo îfade kerdêne. Babeta cinîyan de xesas bî. Girîngê dayîne nasnameyê cinîyan. Hemverê kiştinê cinîyan her wext hêrsê aye berz bi. Na babete de xeylêk hîsgêr bî. Dima ra cayêko de dest bi xebate kerd. Cayê ke xebitîyayîne baş nêbi la bi kesî dir nêbîne muxatab û karê xo kerdêne. Zaînal Abarokavî zî uca de xebityayîne. Uca de yewbînan nas kerdêne. Dima ra wextêko serê çapemenîya komelî de bî embaz. Têkilîyê înan wina dest pêkerd. Vernê de problem çinbi. Dima ra ma dî probleman ciwîyena. Dima ra ma rê qalî kerdêne.”

 

‘Xeylêk babetan de Gulîstane sînor kerdêne’

 

Cansuye da zanayene ke mabêne Gulîstan û Zanînal Abarokovî de her wext munaqeşe vejîyayîne û Abarokov kesêko teda kerdêne bi û terzêko embazîya înan ke qedîyayîne û dest pêkerdêne estbi. Cansuye wina va: “Zaînalî, Gulîstane zaf aciz kerdêne. Hewl dayîne her wext teda serê ci de bikero. Mudaxaleyê saetê tebervejîyayîşê teberî kerdêne. Nêwaştêne şêro verê kesî. Şan de dimayê saeteke nêvejîyayîne teber. Ma her wext Gulîstane îqaz kerdêne. Ma vatêne no wina derbaz nêbeno. Gulîstane zî nê zanayîne. Aye zî vatêne no têkilî wina derbaz nêbeno. La qet ma goşdarî nêkerdêne. Dima ra Zaînalî waşt ke têkilîyê xo biqedêno. Gulîstane vernê de nêwaştêne. La dima ra pêvînayîş birnayî. Ez nêzana no prosesî de se bi. La Gulîstane vatêne qedîyayo. Texmînê mi di mengî nêameyî têhet. Dima ra roja ke Gulîstane vindî bena, bi Zaînal dir pêvînayîş kena. Ma nêzanê pêvînayîş de se bi. Ma wina texmîn kenê ke bi hawayêko rast nêameyo qalîkerdene.” 

 

‘Dêrsimo ke her kes yeno taqîbkerdene, qeydê kamera çin o’

 

Cansuye va ke ê bawer nêkenê ke Gulîstane întîxar kerda û va: “Di mengî yo xebate dewam kenê. Labelê xebatêka xurt nêameye kerdene. Gulîstane awe de nîya. Ma wina fikrîyenê. Seba ke Gulîstane cinîyêka ke întîxar bikero nîya. Keyeyê aye bi rojano tîya yo. Zanayîşêko raşt nîno parekerdene. Eke awe de bibayîne rew ra do biameyne vînayene. Heto bîn ra mamosteyêko Gulîstane rê teda kerdêne bi. Aye zî nê ra tesîr bîne. Moralê aye xira bîne. Ma Dêrsîmî de her ca de yenê taqîbkerdêne. La senîn beno gelo cayê ke Gulîstane vindî bena mobesa çin o. Ma wazenê ganî zanayîşêko ci ra bigîrê. Eke întîxar kerda zî dimayê pêvînayîşê Zaînalî ra no qerarî girewta û berpirsîyar zî Zaînal o. Gelo çira Zaînal yeno pawitene.”

 

Cansuye dewam de wina va: “Ne Gulîstane ne zî keyeyê aye tena yo. Çîyê ke ameyî sereyî Gulîstane nînê qebûlkerdene. No netîceyê polîtîkayêko bi zanebîyayîş yeno kerdene. Gere cinîyê ciwanî wayîrê hişmendî bê. Vera her teda û hêrişî ganî xo bipawê. Zaînalî serê Gulîstane de şîdetê psîkolojîk kerdêne. Mamosteyî şîdetê psîkolojîk kerdêne. Nê çîyê normal nîyê. Ma do destûr nêdê ke normal zî bibê. Ma Dêrsîmî de yê û her roje omid pawenê. Ma omid kenê cayê asayîşî de ya. Gulîstane cinîyêka întîxar bikero nîya. Ez wina fikrîyena.”