WAN - Cinîyê ke ciwîyayîş bi keda xo mûnenê, dîyar kerdî ke keda înan keye de zî ciwîyayîşê karî de zî nîna vînayene û vat: “Ma do semedê şert û mercê têduştî û dinyayêka azade, 8ê Adare de meydanan de bê.”

 

8ê Adare Roja Cinîyanê Dinya nêzdî beno û Wan de zî cinî do semedê şert û mercê ciwîyayîşê bêtêduştî, bikewê meydanan.

 

‘Mi koşilê xo şikna û ez vejîyaya’

 

Hulya Karahana ke werd viraznena û reya ewil kewta cuya xebate, arde ziwan ke no semedê aye xeyal o û vat: “Mi her wext waştêne semedê xo û domananê xo bixebityî. La ez ameya astengkerdene. Serrêka yo ez cayêko de werd viraznena. Ez zî sey pêro cinîyan, nêwazena hewceyê mêrdeyê xo bibî. Ez êdî hewceyê xo û domanê xo eşkena bigîrî. Mi kaşilê xo şikna û ez vejîyaya. Ez o 8ê Adare de zî meydanan de biba.”

 

‘Keda ma yena werdene’

 

Azad Şîmşeke zî esnafî kena, da zanayene ke 8ê Adare roja qirkerdene yo û vat: “Cinî wayîrê kadêka pîl ê. Cinî do 8ê Adare de bi cil û belgê xo wareyan de bê. Ganî hemverê heq û keda cinîyan rêzdarî bibo. Hem keye de hem zî kuçe de keda cinîyan yena werdene. Ez o semedê xo û pêro cinîyan 8ê Adare de meydanan de bî.”

 

‘Cinî û camêrdî eynî şertan de nêxebityenê’

 

Zehra Buraka ke ebeye ya, dîyar kerde ke wareyê xebate de keda cinîyan nîna vînayene û vat, keye de zî îhlalkerdişê kede dir yenê rî bi rî û vat: “Zîhnîyetêko esto bi zanebîyaye cinîyan nêvîneno. Ma semedê heqê xo têkoşîn kenê. Cinî û camêrdî bi tu hewa sey yewbînan nîyê. Ma do vera nê 8ê Adare de meydanan de bê.”

 

Canan Durmaze ke kedkara keyeyî ya wina vana: “Ez serê siba saete 06.00 de wirzena û domanan erşawena mektebe. Dima cû pakîtî kena. Domanê min ê bînî wirzenê. Ez arayî amade kena. Domanan dir eleqedar bena. Werd amade kena. Her deqe pey karî de ya. Pereyê ke camêrdî danê zî qîmê lazimîyê mutbexî nêkenê. Wa wazenê heqdestê kedkarê keyeyan zî bibo. Vera pêro îhlalkerdan ma do meydanan de bê.”