MÊRDÎN - Camêrdo bi nameyê M.D menga Çele de seba ke vera domanêka hêrişê cinsî kerdib, îfadeyê ci ame girewtene û dima ra serbest ame veradayene. La vejîya meydan ke camêrdo bi nameyê M.D verê zî eynî taxe de vera xeylêk domanan rê hêrişê cinsî kerdo.

 

Qezaya Artuklu ya Mêrdînî menga Çele de domanêk hetê camêrdo bi nameyê M.D (65) ra rastê hêrişê cinsî amebî û M.D serê gerrekerdişê keyeyî ser amebi tepiştene û dima ra serbest amebi veradayene. La vejîya meydan ke nê kesî taxe de xeylêk domanê bînî gelek zî îstîsmar kerdê. Menga Çele M.Dyî vera domane hêrişê cinsî kerdib, hetê welatîyê taxe ra amebi tepiştene û teslîmê polîsan amebi kerdene. Dimayê muracatê keyeyî M.D amebi tepiştene û rojêk dima serbest amebi veradayene.

 

M.D dimayê ke serbest ame veradayene zî werte ra vindî bi. Dimayê hedîse, domanêk mektebê vera keyeyî M.Dyî de wendêne zî keyeyê xo ra va, rastê hêrişê cinsî ameya. Keye şi mektebî û îrade dir pêvînayîş kerdî. Îdarekarê mektebî nê ser o kewtî tevger û muracatê sûcî yê keyeyan eşrawit dozgerîye. M.D yo ke nîno zanayene ça de yo, derheqê ey de muracatê sucî ame kerdene. Welatîyê taxe dîyar kerdî ke ganî MD bêro tepiştene.

 

‘Do her ca de wina bikero’

 

Welatîyê taxe ra Esraye arde ziwan ke gumanbar hîna tebera geyreno û vat ê seba nê bi endîşe yê û wina v: “Pêwa ke keyeyî gerre kerd, gumanbar ame tepiştiş û dima ra serbest ame veradayîş. Xeylêk domanan îstîsmar kerdo. Eke no nêvejîyayîye meydan hîna xeylêk domanan zî îstîsmar bikerdêne. Verê zindan de mendo. Nika kes ci ra bawer nêkeno. No kes nîno keye û ça de bo do wina bikero. Gere seba nê tedbîr bêrê girewtene.

 

Heto bîn ra zî ame zanayene ke M.D verê zî sucê hêrişê cinsî ra serrêk û nîm zindan de mendo.