Aygul Kabaîş: Ganî her kes vera mergê cinîyan vengê xo berz bikerê 2026-11-18 11:20:54   AMED - Dayîka Rojîn Kabaîşe ya ke bi guman dinyaya xo bedelnaye, Aygul Kabaîş no vengdayîş kerd: "25ê teşrîna peyêne de ma do kuçeyan de bê. Ganî her kes hemverê merdişê cinîyan bikewo kuçeyan. Lazim o ma bikewê kuçeyan. Ma bêveng bimanê do mergî hîna zêde bibê."   Têkoşînê cinîyan ê hemverê şîdetê cinîyan ser, qetilkerdiş û bêcezaverdayîşê gumanbaran dewam keno. Bi têkoşînê cinîyan ê pîlî 25ê teşrîna peyêne Roja Têkoşînê Hemverê Şîdetê Cinîyan yê Mîyanneteweyî yeno organîzekerdiş. Mîyanê kesanê ke 25ê teşrîna peyêne de vengê xo berz kenê de keyeyê cinîyanê ameyî qetilkerdiş zî est ê. Dayîka wendekara zanîngeha Yuzuncu Yilî Rojîn Kabaîşe ya ke bi guman dinyaya xo bedelnaye, Aygul Kabaîşe zî 25ê teşrîna peyêne de bi persa 'Çi bi Rojîne ame' vengê xo berz kena.   'Ez edalet wazena'   Aygul Kabaîş va ke dimayê merdişê biguman ê kênaya aye gumanbarî hema nêameyî vînayîş û waşt ke gumanbarî bêrê cezakerdiş. Aygul Kabaîş wina va: "Kênaya mi bi hewes şî dibistane. Kêfê aye cayê xo de bî. Ma aye emanetê wargehî kerd. Di rojan de çi ame sereyê aye? Ma nêwazenê qetilkerî kuçeyan de bigeyrê. Nêverdayî Rojîne xeyalê xo pê bîyaro. No di serrî yo zerreyê ma veşeno. Qetilkerî kamî yê wa bivejê orte, kamî ra tersenê? Rojîne şewe nêameye wargeh, çira agahî nêdayî ma? Ma mudirê wargehî ra razî nîyê. Cinî semedê Rojîne têkoşîn kenê. Ma 70 hezar îmza kom kerd û berd meclîs. Ez edalet wazena."   'Ganî hemverê merdişê cinîyan ma bikewê kuçeyan'   Aygul Kabaîş wina qedêna: "Ez venga heme cinîyan kena. Wa 25ê teşrîna peyêne de bikewê kuçeyan. Ganî her kes hemverê merdişê cinîyan vengê xo berz bikero. Ma hemverê merdişan bêveng bimanê do mergî hîna zêdeyêr bibê. Ez nêwazena cinî bimirê.”