TAJÊ: Ganî Iraq îradeyê îdarî û sîyasî yê êzidîyan nas bikero 

2026-11-12 15:38:54


	 

	MERKEZÊ XEBERAN - TAJÊ, 11emîn serrgêra rizgarkerdişê Şingalî de eşkera kerd ke bi felsefe û keda Rayberê Şarê Kurdî Abdullah Ocalanî û bi têkoşîna şervanê azadîyî û şehîdan verê qirkerdişî ame girewtene û vat: “Ma na roja rizgarkerdişî de dîyar kenê ke wefadarîya ma ya tewr girde, awankerdiş û pawitişê Şingaleyêka azad a.”

	 

	Tevgera Azadîya Cinîyanê Êzidîyan (TAJÊ), 11. serrgêra rizgarkerdişê Şingalî de eşkerayîyêk nuşteyî daye. Eşkerayî de ame vatene ke bi felsefe û keda Rayberê Şarê Kurdî Abdullah Ocalanî û bi têkoşîna dîrokî ya şervanê azadîye û şehîdan verê qirkerdişê Êzidîyan ame girewtene.

	 

	Eşkerayîya nuşteyî wina ya:

	 

	“Ma 11emîn serrgêra rizgarkerdişê Şingalî, verê pêroyî şarê xo yê xoverdayoxî, pêroyê şehîdanê azadîyî û Rayber Apo rê pîroz kenê.

	 

	Ma şexsê fermandaranê girdanê sey Şehîd Dilşêr Herekol, Şehîd Egîd Cîvyan, Şehîd Berfîn Nurheq, Şehîd Berxwedan, Şehîd Nûjîn Amed, Şehîd Dijwar, Şehîd Nûjiyan Erhan, Şehîd Zekî û Şehîd Seîd de, pêroyê şehîdanê ke seba rizgarkerdişê Şingalî canê xo fîda kerd û nê destanî rê pêşengî kerd, minetdar ê û înan bi rêzdarî yad kenê.

	 

	3ê tebaxe ya 2014î de, komela ma bi fermanêka qirker û hov reyde rû bi rû mend. No ferman reyde, hezaran merdimê ma mecbûr mendî ke cî û warê xo ra koçber bibê û bedelanê zaf giranan bidê. Verê pêroyî dayîk û keynayê ma yê Êzidî, hezaran cinî kewtî destê hovîtîya DAIŞî û birînê kûrî zerrî û hişê ma de ameyî akerdene. Labelê bi fikir û keda Rayber Apo û bi cehdê dîrokî yê gerîlayanê azadîyî, verê na qirkerdişî ame girewtene. Ma na roja rizgarkerdişî de fîdakarî û keda înan a pîroze yad kenê û dîyar kenê ke wefadarîya ma ya tewr girde, awankerdiş û parastişê Şingaleyêka azad a.”

	 

	‘TAJÊ nasnameyê azad û îradeyê serbixo yê cinîyanê Êzidîyan ard meydan’

	 

	“No ferman de êş û zilmê tewr giran ma cinîyan ser o bî. Seba ke komela ma reyêk bîn bi feleketanê wina reyde rû bi rû nêmano, ma hêz û rêxistinbîyayîşê xo yê pawitişî û sazîyê xo yê komelî awan kerdî. 12 serrî yo ke ma birînanê xo derman kenê û cehd kenê ke verê fermananê neweyan bigîrê. No çarçewa de, sey TAJÊ ma xebatanê zaf muhîman rê rayberî kerdî û nasnameyêka azad û îradeyêko serbixo yê cinîyanê Êzidîyan ardî ver.

	 

	Ewro herêm de şerêko dijwar û aloz yeno kerdene. Dewletê herêmî qirîzanê kûran de yê; tûjkerdişê nijadperestî û olperestîye zî her ku şîyeno zêdeyêr beno. Na rewşa aloze de, verê her kesî cinî zerar vînenê û şîdetê serê înan zêdeyêr beno. Sey cinîyanê Êzidî ke ma bedelê zaf giranî dayî, ma pêroyê hêzanê demokratîk, azadîxwaz û wijdanin rê vengdayîş kenê ke piştîdayîşê xo yê cinîyanê Êzidî û Şingalî rê xurtêr bikerê.

	 

	Hema, ma dewleta Iraqî rê vengdayîş kenê ke êş, waştiş û birînê komelaya ma rê berpirsyarêr nêzdî bibo. Hema zî hezaran cinî û domanê ma vîndî yê û aqûbeta înan eşkera nîya. Coka ganî dewleta Iraqî bi lez nê gaman bierzo:

	 

	1 – Jenosîdê ke komela ma ser o ame ramitene, bi hawayêko fermî bêro naskerdene.

	 

	2 – Seba dadgehkerdiş û hesabpirsîyayîşê sûcdaran bikewo mîyanê gêrayîşê.

	 

	3 – Seba zelalkerdişê aqûbeta merdimanê ma yê vîndîyan, komîsyonê çalakî awan bikero.

	 

	Wexto ke hetê Rayber Apo ra prosesê awankerdişê Komelê Demokratîkî dest pê kerd, seba ma zî merheleyêka newîye ya newîbîyayîş û xobîyayîşî dest pê kerd. Ewro bi keda Rayber Apo û gonîya şehîdanê ma, ma resayî îradeyêka girde ya pawitişî û têkoşîneyêka bêemsal. Eke ewro dewleta Iraqî reya verêne de vîn û sazîyê pawitişî yê komelaya ma qebûl kerdo, no berhemê nê têkoşîn û xoverdayîşî yo.

	 

	Labelê ma rind zanenê ke garantîya tewr girde ya veraroja ma, tena hêz, vîn û rêxistinbîyayîşê komelaya ma bi xo yo. Coka ganî dewleta Iraqî tena bi entegrasyonê eskerî sînordar nêmano; wextê xo de entegrasyonê demokratîkî yê sazî û rayberîya xoser a Şingalî zî bi fermî nas bikero. Hema, seba garantîkerdişê heqanê cinîyan Iraq pêro de û heqanê cinîyanê Êzidî, ganî qadê sîyasî û qanûnî de vurnayîşê bingeyî bikero û gamê demokratîkbîyayîşî bierzo.

	 

	Sey Tevgera Azadîya Cinîyanê Êzidîyan (TAJÊ), heta ke îradeyê şarê ma temam bêro naskerdene, ferman fermî bibo jenosîd û aqûbeta pêroyê vîndîyanê ma zelal bibo, ma do têkoşîn û xoverdayîşê xo bi biryardarî dewam bikerê.”