‘Sererastkerdişêk demkî nê ganî qanûnêk bingehîn bibo’ 

2026-07-03 09:59:34


	 

	STENBOL - Avûkate Arzu Eylem Kayaoglu da zanayene ke gere tanzîmkerdişê qanûnî yo ke çarçewaya qanûnê çarçewa de yeno munaqeşekerdiş sey pakêtêk demkî nêro vînayîş û va: “Hewcedarî bi qanûnêko bingehîn est o ke fersendê demê demokratîk ê 100 serrî yê Tirkîya dîyar keno.”

	 

	Munaqeşeyê "Qanûnê çarçewa" dewam kenê; qanûn sewîyeyêka newe de yo û munaqeşeyê ke verê meclîs bikewo betlane gere bibo qanûn, dewam kenê. Endama Komeleya Hiqûqnasê Seba Azadîye (OHD) avûkate Eylem Arzu Kayaoglu derheqê babete de qisey kerd.

	 

	Eylem Arzu Kayaoglu derheqê qanûnê çarçewa û qanûnê bingehîn de erjnayîş kerd û va gere no tenê sey tanzîmkerdişêk demkî nêro vînayîş; bal ante serê çarçeweyêka mende ya derbazbîyayîşê zemînê huqûqî û sîyasetê demokratîkî. Eylem Arzu Kayaoglu wina vat: “Ma huqûqnasî qanûnêk demkî nêwazenê. Qanûnê derbazbîyayîş sewîyeya pozîtîfe ya awankerdişê zemînê sîyasetê demokratîkî û metodê huqûqî îfade keno. Qanûnê çarçewa yan zî qanûnê kokî eynî çîyî îfade kenê. No qanûn seba mendebîyayîşê aşitîye, awanbîyayîşê cimatê demokratîkî yo ke verê tanzîmkerdişanê qanûnî akeno est o.”

	 

	‘Pêwa gaman tanzîmkerdişî nînê caardene’

	 

	Eylem Arzu Kayaoglu wina dewam kerd: “Dimayê vengdayîşê Aşitî û Cimatê Demokratîkî yê Abdullah Ocalanî, 30 gerîlayan çekê xo vêşnayî û di serrî ser ra derbaz bî. No proses tenê prosesê bêvengbîyayîşê çekan nîyo. Vernî de birêz Ocalanî û têgêrayîşê sîyasî yê Kurdî, DEM Partî, sîyasetmedarî her wext vanê ke proses negatîfî ra derbazê prosesê pozîtîfî bi. Prosesê negatîfî çi bî? Bipeynîbîyayîşê pêkewtişan bi. Yo pozîtîf çi bi? Çarçewaya huqûqî û demokratîk de hîrakerdişê wareyê demokratîkî bi. Labelê îqtîdar çîyêk nêkeno. Tanzîmkerdişê qanûnî nêkeno. Wareyê sîyasetî her ke şino fetêsêno.”

	 

	‘Kêmîyê verênî asayîşê qanûnî bi’

	 

	Eylem Arzu Kayaoglu ard ziwan ke kêmîyê tewr pîl ê prosesanê muzakereyê yê serranê verênan, tora qanûnî û sewbîna temamê prosesî însîyatîfanê şexsî re verdayîş bi û va: “Prosesanê ke ameybî cuyayîş de asayîşê qanûnî çin bi. Nê temamî însîyatîfê şexsî yê temsîlkarênê îqtîdarî rê ameyî verdayîş. No zî cimat dir şiknayîşêk pîl viraşt. Prosesî nê semedî ra ameyî çinkerdiş. Gere cimat her wext na sewîyeya pabebîyayîşî de bo. Gere şar serkêşê prosesî bo û rolêk aktîf kay bikero.”

	 

	Eylem Arzu Kayaoglu tewr peyên bal ante Konferansê Hiqûqnasanê Kurdan yo ke do 4-5ê Temmuze de Amed de pê bêro û va: “Do konferansê ma pê bêro. Ameyîşê heme rayapêroyî yê demokratîk, yê ke wazenê prosesî taqîb bikerê û OHD’yî dir bê, do ma keyfweş bikero û do fersendê ke xebatanê ma bivînê, bidest bikerê.”