
‘Eke proses samîmî bo ma zî semedê paştdayîşî amade yê’ 

2025-05-12 10:39:48


	&nbsp;

	&nbsp;

	Rabîa Onver

	&nbsp;

	COLEMÊRG - Sereka CHP ya Colemêrgî Suzan Çakirbeylî derheqê proseso ke bi vengdayîşê 'aştî û komelê demokratîkî' yê Rayberê Şarê Kurdî Abdullah Ocalan dest pêkerdo de qisey kerde û va: "Eke proses samîmî bo ma zî seba piştgirîye amade yê."

	&nbsp;

	Rêberê Şarê Kurdî Abdullah Ocalan 27ê Sibate de 'venga aştî û komelê demokratîkî' da û badê naye waştişê vurnayîşan wareyê sîyasî û huqûqî de ameyî kerdene. Heyeta DEM Partî ya Îmralî na çarçewa de pêvînayîşî kerdî û ya peyêne zî 24ê Nîsane de Wezaretê Edaletî reyde kerd.&nbsp;

	&nbsp;

	Sereka CHP’yî ya Colemêrgî Suzan Çakirbeylî derheqê venga 'aştî û komelê demokratîkî' de ercnayîşan kerd.&nbsp;

	&nbsp;

	'Proses samîmî bo ma zî amade yê'

	&nbsp;

	Suzan Çakirbeylî dîyar kerd ke verê zî seba prosesê aştîye gamî ameyî eştene la bênetîce mendî. Suzan Çakirbeylî wina dewam kerd: "Ma sey CHP sere ra hetê aştî û demokrasîyî yê. Şeno Tirkîyayêko bêçek û şer bêro awankerdene. Seba aştîyêka mayînde demokrasî, edalet, têduştî muhîm o. No bêro awankerdene çira nêbo. Sey serekê ma yo pêroyî vano; ma wazenê Tirkîyayêka azad û demokratîk bêra awankerdene. No proses samîmî bo ma seba paştdayîşî amade yê. Ma zaf nêzanê her di hetî çi qisey kenê. Aşmêke yê pêvînayîşî yenê kerdene. Çîyo ke ma wazenê no yo, eger samîmî yê ca meclîs o. Pêvînayîşî, qiseykerdişê ucayî hîna samîmêr ê."

	&nbsp;

	'Proses binê sîwanê meclîsî de bêrokerdiş do hîna rind bo'

	&nbsp;

	Suzan Çakirbeylî dîyar kerd ke eger proses binê sîwanê meclîsî de bêro kerdiş do hîna samîmî û bawerêr bo û wina îfade kerd: "Bêguman nê mesajî û vengan seba ma bi erj û muhîm ê. Ez reyna vana, komêko ke pêro partîyê sîyasî tede yê binê sîwanê meclîsî de do paştdayîş bido prosesî. Do proses hîna zêde pozîtîf aver bero."

	&nbsp;

	'Proses samîmî nîno kerdiş'

	&nbsp;

	Suzan Çakirbeylî bale ant ke sey pêro partîyan CHP zî aştî û têduştî wazeno û hetê prosesî yo, paştdayîş dano prosesî. Suzan Çakirbeylî va: "Ma Tirkîyayêke ke dayîkî nêbermenê, kes nêmireno wazenê. Goreyê mi proses samîmî nîyo. Hem vanê prosesê çareseyîye, hem hemşaredaran wezîfe ra gênê û kenê mîyanê zîndanî. No zî nakokîyê hukmatî mojneno. Ganî her di hetî seba aştîyêka mayînde gamê rindî bierzê."

	&nbsp;