Hemverê fuhuş û tiryakî de têkoşîn: Platformê Şîyar be 

2025-04-23 09:06:01


	 

	Şehrîban Aslan

	 

	AMED - Bi amancê têkoşînê hemverê tîryakî û fuhuşî, Amed de xeylêk sazgehî ameyî têhet û platformê ‘Şîyar be’ do 26ê nîsane de bi rayîrşîyayîşêk îlan bikerê.

	 

	Kurdistan de polîtîkayê şerê taybetî roj bi roje tesîr serê cuya şarî de keno. Sere de Amed û bajarê bînî çeteyê fuhuş û tiryakî est ê. Nê çeteyê ke bi destê dewlete ameyê bicakerdiş, ciwanan keno faqe xo. Sazgehê demokratîkî yê Amedî ameyî têhet û hemverê nê platformî de "Şîyar be" awan kerdî. Platform do 26ê nîsane de bi rayîrşîyayîşêk Sumerpark ra heta Keçîburcu dewam bikero û bêro deklerekerdiş. 

	 

	Derheqê awankerdiş û xebatan de Verfeka Platformî avûkate Gulşen Demîr ajansê ma JINNEWS'î rê qisey kerd.

	 

	‘Emrê şuxilnayîşê tîryakî vejîya 9’

	 

	Gulşen Demîr da zanayîş ke ê sazgehanê demokratîkan dir ameyê têhet û 5 aşmî yo nê ser de şuxilênê û wina va: “Kurdistan de sere de zî Amed de cinîyê ciwanî, tutî û ciwanan ser o nê caardişî est ê. Xeylêk sazgehê ma, şaredarî û STK’yî ware de xebate kerdî û vînayî ke emrê şuxilnayîşê tiryakî vejîyayo emrê 9î. Na raştî ma kerd mîyanê xofî û ma dejnayî. Ma zanê sîstemî verê xo dayo ciwanan. Ma zî dî ke ganî xetêke têkoşînî bêro awankerdiş.”

	 

	Sewîyeya platformî amî vatiş

	 

	Gulşen Demîr sewîyeya awankerdişê platformî de wina va: “No platform hewcedarî ser o ame awankerdiş. Ma name zî sey ‘Şîyar be’ dîyar kerd. Ma serdayîşê xeylêk sazgehan kerd. Ma pêşnîyazî û nimûneyan arê da. Sazgehan zî pêşnîyazîyê xo vatî. Ma do bi paştdayîşê sazgehan keyeyan dir bikewê têkilî. Ma hewl danê ke xetêke têkoşînî awan bikerê. Ma do 26ê nîsane de platform deklere bikerê. Ma venga pêro kesan kenê ke wayîrê platformî vejîyê.”