Pazarcix ame xovîrrakerdiş

2025-02-05 11:14:40


	 

	  

	Derya Ren

	 

	MEREŞ - Serê erdlerzê 6ê sibate ra di serrî derbaz bî la hema şar konteyniran de ciwîyeno. Cinîyê ke mahkumê konteyniran ameyî kerdiş dîyar kerdî ke semedê konteynir teng ê zehmetîyan ancenê, her cayî de mereyî geyrenê û tersan ra nêeşkenê rakewê.

	 

	Qezaya Pazarcixî ya Mereşî ke 582 awanî rijyayî û serekkomarî dîyar kerd ke do serrêke de awanî bêrê teslîmkerdiş. La no soz bica nêame. Erdlerzî de yê ke kîra de bî, TOKÎ’yan de nêbî wayîrê heq û hema zî mehkumê konteyniran ê.

	 

	Cinîyê Pazarcixî derheqê erdlerzî de qisey kerd û vatî; îqtîdar sozê ke dayê bica nêardo.

	 

	‘Ma hewl danê biciwîyê’

	 

	Cinîya bi nameyê Server Kocaman (47) wina vat: “Ez hewl dana 4 tutanê xo bidî wendiş. Bi qaso ke destê ma ra yeno ma kenê. Ez nêeşkena keyeyêk kîra bikerî. Nika vayîya keyeyan tewr tay 10 hezar TL ya û demê fatûreyan de werd û şimitiş zî zêde beno. Ganî tewr tay 40-50 hezar meaş cêbê ma de bibo. Ez vernîya erdlerzî kîra de bîya. Coka tu heqê mi çin o. Ma her çî vînî kerd. Nika ma hewl danê ke  konteynerê qijî de biciwîyê.”

	 

	‘Ma tersan ra ranêkewenê’

	 

	Elîf Yaşkiran (65) çîyê ke konteyniran de ciwîyenê qal kerd: “Ma rezîl û riswa bîyê. Ma tîya perîşan benê. Kîra vay a. Ma nêeşkenê debara xo bikerê. Ez ewnîyena di tornanê xo ra. Di lajê mi est ê. Ameyîşê ma yê aşme 14 hezar o. Lajêk mi semedê deynan întîxar kerd. Mereyî her cayî de gêrenê. Ma tersan ra nêeşkenê rakewê.”

	 

	‘Ma zor û zehmetî ancenê’

	 

	Fatma Ede (42) zî wina vat: “Verê ma kîra de bî. Badê erdlerzî zî heq nêdayê ma. Ma ardî nê konteyniran û ma bêwayîr verdayî. Ez nêweşa epîlepsî ya. Meaşê teqawîtî yê pîyê mi mendo, est o. Ma hîrê kesî debara xo bi nê kenê la zehmet o. Ma tîya zehmetî pîlan ancenê.”

	 

	‘Hetkarîya kîra birnayî’

	 

	Zeynep Ede (67) zî dîyar kerd ke di serrî yo konteyniran de ciwîyena û vat: “Kênaya mi nêweşa  epîlepsî ya. Konteynir teng ê. Ma nêeşkenê tîya biciwîyê. Kes hetkarî nêdano ma. Ma terkê tîya kerdê. Îmkanê ma yê ke ma şêrê kîra çin ê. Verê hetkarîya kîra dayîne la nika ê zî birnayî.”

	 

	4 hezar qîmê çi keno?

	 

	Melek Yurdakul (80) zî dîyar kerd ke erdlerz de pêro keyeyê xo vînî kerda û bi tena sereyê xo konteynir de ciwîyaya. Melek Yurdakul wina vat: “Ne tutê min mendê, ne wayê û ne zî birayê mi. Cîranî hetkarî danê mi. Dewlete 4 hezarî dana mi. Dermanê mi est ê, werdê mi est o. No pere do qîmê çi bikero?”