12 baroyan ra semedê Tişrînî eşkerayîye

2025-01-20 14:46:56


	 

	  

	 

	MERKEZÊ XEBERAN- 12 baroyê Vakurê Kurdistanî verba hêrişanê dewleta tirkan ke Awbendê Tişrînî ser o benê reaksîyon mojna û va: “Ganî şarê sîvîlî her şert û mercan de bêro pawitene.”

	 

	Baroyê Amed û Wanî zî tede 12 baroyê bajaranê Vakurê Kurdistanî derheqê hêrişanê ke sîvîlan ke Awbendê Tişrînî yê Rojawanê Kurdistanî de nobet gênê ser o eşkerayîye da. 

	 

	Eşkerayîye de ameyo vîrardene ke hêrişo peyên de Kaykerdoxê Tîyatro yê Kurdî Bavê Teyar (Cuma Xelîl Îbrahîm) zî tede 6 kesê sîvîlî ameyê kiştene. Eşkerayîya ke bi sernameyê “Ganî şarê sîvîl her şert û mercan de bêro pawitene” de ameye dîyarkerdene ke hêrişo ke vera sîvîlan bîyo, eşkera binpêkerdişê huqûqê mîyanneteweyî yo.

	 

	Dewamê eşkerayîye de wina ame vatiş: “Cayanê bînan ê Surîye de êdî cuye normal bîya la Vakur û Rojhelatê Surîye de hema zî şer dewam keno. Hêrişo tewr peyên de ke vera Awbendê Tişrînî de bîyo, hunermendo kurd Cuma Xelîl Îbrahîm (Bavê Teyar) zî tede 6 kesê sîvîlî dinyaya xo bedilnayî û 15 kesê sîvîlî zî birîndar bîyî. Heq rehma xo kaykerdoxê şanoyî Bavê Teyarî ke komelê kurdî ey ra zaf hes keno û sîvîlê bînî ke dinyaya xo bedilnayî ser de bikero û ma seba birîndaran şîfaya xeyrine wazenê.” 

	 

	Baroyê ke eşkerayîye îmze kerdî nê yê: Semsûr, Agrî, Êlih, Amed, Îdir, Colemêrg, Mardîn, Mûş, Sêrt, Riha, Şirnex û Wan.