Cinîyê Wanî: Cayê çareserîye Îmrali yo

2024-10-22 13:11:24


	 

	 

	WAN - Cinîyê Wanî derheqê polîtîkayê tecrîdî yê Rayberê PKKyî Abdullah Ocalanî ser de qisey kerdî û vatî, “Ma wina fikrîyenê ke ganî êdî hukmetê AKP û MHPyî semedê aştîye gamêke bierzê û na gama aştîye Birêz Abdullah Ocalanî dir bêro eştiş. Ma şer nêwazenê, êdî wa gonî nêro rijnayîş. Wa pêro dayîkî bibê yew û aştîye biwazê.

	 

	Cinîyê Wanî diyar kerdî semedo ke aştî pê bêro, ganî tecrîdê Rayberê PKKyî Abdullah Ocalanî ser o lezkî bêro wedaritiş û azadîya fîzîkî ya Rayber Apo bêro qetîkerdiş.

	 

	'Ma wazenê tecrîd bêro wedaritiş'

	 

	Şadîye Akdil, dîyar kerd ke bi serran o serê Rayberê PKKyî Abdullah Ocalanî polîtîkaya tecrîdî yena kerdiş û wina vat: “No wextêk derg o ne avûkatî û ne zî keye, Rayber Apo dir mîyanê têkilî de nîyo. Sey rayaumûmî no wextêk derg o, ma tu agahî ci ra nêgirewta. Ez sey dayîkêke zî veng dana; ma wazenê Îmrali ra agahîyêke bigîrê. Ma wazenê keye û avûkatî pêvînayîşê Rayber Apo dir pê bîyarê.  Tecrîdê Îmraliyî pêro zîndanan de vila bîyo û ma wazenê ke no tecrîd lezkî bêro peynîkerdiş. 

	 

	'Bêrê ma dest bidê yewbînan û aştî biwazê'

	 

	Şadîye dîyar kerd, heqê tepişteyê nêweşî û yê nînê dermankerdiş est ê û vat: “Ma sey dayîkî êdî nêwazenê xemgîn bibê. Çi kurdî,  Çi tirkî, çi  erebî semedê ma ferq nêkeno, ma merg nêwazenê. Ma cuyêke mîyanê yewîye û aştîye wazenê. Ma şer nêwazenê û nêwazenê gonî bêro rijnayîş. Pêro dayîkî bêrê ma bibê yew, destê xo bidê yewbînan û aştîye biwazê."

	 

	'Ganî Birêz Abdullah Ocalanî dir gamê aştîye bêrê eştiş'

	 

	Ceyda Dîndar zî wina dîyar kerd: “Ma zanê ke Tirkîya bi wedaritişê tecrîdê Îmraliyî dir eşkena krîzê ke nêeşkena werte ra wedarno derbaz bikero. Ma zanê ke dimayê munaqeşeyê Rayberîye dir do çareserî pê bêro. Ma dîyar kenê ke ganî tecrîdê demdergî peynî bibo û şarê kurdî êdî vengê Rayberê xo bieşnawê. Yewine rayîrê çareserî Îmrali yo. Ma vanê ke ganî êdî hukmatê AKP û MHPyî game semedê aştîye bierzê û na gama aştîye Birêz Abdullah Ocalanî dir bêro eştiş.”