
‘Hemverê polîtîkaya bêcezaverdayîşî têkoşîn lazim o’

2024-10-22 11:04:54


	&nbsp;

	&nbsp;

	Pelşîn Çetînkaya&nbsp;

	&nbsp;

	AMED - Psîkologe Bahar Bayindir, bale ant polîtîkaya bêcezaverdayîşî ser û vat: "Zêdebîyayîşê şîdetî û qetilkerdişê cinîyan girêdayeyê polîtîkayê îktîdarî yê bêcezaverdayîşî yo."&nbsp;

	&nbsp;

	Şîdeto ke bîyo unîversal, pêro wareyê beşê komelî rê vila bîyo. Dayeyê ke ajansê ma arêdayî, tenê 10 aşmê peyîn de Kurdistan û Tirkîya de 273 cinî ameyê qetilkerdiş, 148 cinî bi şik dinyaya xo bedelnayî. Cinîyan dîyar kerd ke bêcezaverdayîş beno sebeb ke hûmare kiştişî bibo zêde.

	&nbsp;

	Derheqê babete de psîkologe Bahar Bayindir ajansê ma JINNEWSî rê qisey kerd.&nbsp;

	&nbsp;

	Bahare, dîyar kerd ke şîdet hema qîjî ra dest pêkeno û wina vat: "Psîkolojîya merdimî tu wext nêeşkena norm, erc û sîstemê komelî cîya bigîrê. Psîkolojî girêdayeyê dînamîkê keyeyî yê. Nimûne wexto ke kesêk bêheskerdişê keye û mîyanê şîdetî de pîl bibo tesîr beno, eynî kes bi eynî helwestî hemverê pêro ganeyan de mojneno. Eke kesêk bizano ke yeno heskerdiş, hurmet û erc vîneno eşkeno erc bido komelî û tu wext nêeşkeno zirar bido komelî."

	&nbsp;

	'Ganî kerdoxî bêrê cezakerdiş'

	&nbsp;

	Bahare dewam de wina vat: "Polîtîkaya bêcezaverdayîşî dir, rayîr zêdebîyayîşê şîdetî akeno. Xeylêk reyan yeno vatiş ke 'Şîdet, polîtîk o' û no çî girêdayeyê polîtîkaya bêcezaverdayîşî yo. Xeylêk welatan wexto ke şîdet pê yeno, mekanîzmeyê ceza kewenê merîyet. La no çî welatê ma de çin o. Semedê pawitişê cinî û tutan, Peymana Stenbolî û qanûnê 6284 est bî û ameyî wedaritiş. Huqûq de nînê caardiş. Merdim vîneno cinîyê ke ameyê qetilkerdiş, bi desin rey muracatê şîdetî kerdê. Ganî kerdoxî biameyîne cezakerdiş û hetê psîkolojî de biameyîne tedawîkerdiş û destekê komelî ci rê biameyîne kerdiş. La semedo ke nê çî nêameyî kerdiş cinî yenê qetilkerdiş."&nbsp;

	&nbsp;

	'Ganî têkoşîn bêro pîlkerdiş'

	&nbsp;

	Bahare, tewr peyîn wina vat: "Ganî hemverê polîtîkaya bêcezaverdayîşî helwestêk zelal bêro mojnayîş. 3 serrî yo Peymana Stenbolî ameya betalkerdiş û ma vînenê ke mîyanê 3 serran de şîdetê hemverê cinî, tut û heywanan zêde bo. Hemverê nê de dezgehê sivîlî yê komelî de û hîn şexsî sîstemêk awan kenê, la çîyo ke nika hewce keno zî pîlkerdişê têkoşînê hemverê polîtîkaya bêcazaverdayîşî yo."&nbsp;

	&nbsp;