‘Hemverê talanî têkoşînê ekolojîkî pîl beno’ 

2024-10-21 10:18:13


	 

	 

	Nazlican Nujîn Yildiz

	 

	MUGLA - Endama Meclîsê Platformê Derûdorî yê Muglayî (MUÇEP) Halîme Şaman derheqê talanê xoza de qisey kerd û vat, hemverê hêrişê xoza de têkoşînê ekolojîkî pîl beno.

	 

	Talanê xoza Tirkîya û Kurdistan de dewam keno. Amancê talanî o yo ke sermayeyê îqtîdarî û şîrketê terefgirî bêrê zêdekerdiş û nê dir wareyê cuye yenê çinkerdiş. Ege de tesîrê ÇEDî yeno ciwîyayîş. Wareyê ekolojîk ke bi dest kenê zî newe ra hedef yenê girewtiş. Endama Meclîsê Platformê Derûdorî yê Muglayî (MUÇEP) Halîme Şaman derheqê talanê xoza de qisey kerd û vat, têkoşînê ekolojîye do bi cigêrayîşê çareserî dewam bikerê.

	 

	Halîme vat, Mugla de 17ê teşrîna verêne de hîrê projeyê ÇEDî ameyî destpêkerdiş û wina vat: “Nê cayêk de tesîr rezervê awe yê qezayanê Mugla ser o kenê yê. No zî mojneno ke her roj dosyayê neweyî wareyê têkoşînê newe yenê akerdiş. Akbelen ra heta Bargîlya Agaoglu, Sînpaş ra heta Deştînî têkoşîn est o.”

	 

	‘Waştî vengê têkoşînî bibirnê’

	 

	Halîme wina vat: “Yewin amancê têkoşînê ma o yo ke qanûnî ca bêrê. Eke her kes karê xo bigîro, xora ma zî nê çî nêkerdêne. Do hewce nêmendêne. Hopa de cînayet kerdî. No munferît nîyo. Aseno ke wazenê têkoşînê ekolojî yê heqdar bêveng bikerê û çimê şarî bitersnê. La ma vanê wa ê bitersê ma nêtersenê.”

	 

	‘Herêma erdlerzî sey wareyê talanî vînenê’

	 

	Halîme wina dîyar kerd: “Herêma erdlerzî de zî talan zêde yo. Herêma erdlerzî sey wareyê talanî vînenê. 2022ine de pêro herêmanê erdlerzan de semedê projeyê awanîya komî, 28 muracatê ÇEDî bîyê. 2023ine de yew muracatê ÇEDî bîyo. Yanî nê herêmî sey wareyê talanî ameyî vînayîş. Hatay de zeytûnî ameyî qetilkerdiş, xespkerdiş.”

	 

	Halîme tewr peyîn wina vat: “Sîyasetî hema ferq nêkerdo ke têgêrayîşê ekolojî resayo nokteyêke muhîm. Semedê nê ganî ma zî wextê newe de têkoşînê çareserîya pêroyî dewam bikerê.”