Halîde Turkoglu: Ma do weçînayîş de çîyanê xo peyser bigîrê 

2023-11-11 15:00:15


	 

	 

	ANQARA - Vervatoxa Meclîsê Cinîyan ê HEDEPî Halîde Turkoglu pare kerd ke îdareyê herêmîyî warê awanîye yê û vat: “Ma do weçînayîşan de çi ma ra ameyo girewtiş, ma do înan peyser bigîrê.”

	 

	Heyetê Cinîyan ê Îdareyanê Herêmîyan ê Demokratîkan ê HEDEPî Anqara de derheqê weçînayîşanê herêmîyan de bi şîarê ''Bi Jin, Jiyan, Azadî ver bi Îdareyanê Herêmîyan ê Azadan'' konferansêk kerd. Xeylêk delege û cinîyê bînî tewrê konferansî kerd. 

	 

	Vervatoxa Meclîsê Cinîyan ê HEDEPî Halîde Turkoglu qisey kerd. Halîde Turkoglu ard ziwan ke ê qetî xoverdayîşê xo û xebatanê xo yê înşakerdişî ra fek vera nêdayo.

	 

	Qiseykerdişê Halîde wina yo:

	 

	“Ma 20 serran ra nata tecrubeyanê îdareyanê herêmîyan pêser kenê û bi nê tecrubeyan modelêk viraşt. No model ewro Rojawan û Şingal de gandar o. Vakur de zî ma kenê ke nê modelî cabikerê coka qeyûmî tayînê şaredarîyanê ma benê. Sîstemê qeyûmî hînî bîyo sîstemêkê rejîmî. Nê rejîmî reyde qirkerdiş û şîdetê vera cinîyan zî zêdîyayî. 

	 

	Tayînkerdişê qeyûman yeno manaya hêrişî

	 

	Rejîmê qeyûman keno ke cinîyan têkoşînê azadîye ra dûrî bigêro. Bi nê rejîmê sîstemê hemserekîye û xîretê cûya têdûşte zî ameyî hedefkerdene. Hemserek û hemşaredarê ma yê cinîyî erşawîyayî zîndanan. La se beno wa bibo ma do tim sîstemê xo bipawê. Xeylêk embazê ma zî Dewaya Dafike ya Kobanê de yenê muhakemekerdene. Îqtîdar bi na dewa qesasê DAÎŞî gêno. Embazê ma yê cinîyî na dewa de tim bi îfadeyanê xo eşkera kenê ke na dewa komployê serdestîya camêrdan o. Kobanê bin nêkewte la na dewa netîceya têkoşînê embazanê ma de do bin bikewa. 

	 

	Sîstemê Îmraliyî israrê şerî yo

	 

	Sîstemê Îmraliyî israrê şerî yo. Ma sey cinîyan do vera rejîmê qeyûman û tecrîdî tim têkoşîn bikerê ke nê wird sîstemî yewbînan ra cîya nîyê. Konferansê ma do azadîya Birêz Ocalanî bikerê rojdemê xo. Modelê ma awankerdişê cuya têdûşt, azad û demokratîke yo ke no model aîdê rayîrê hîrêyînî yo. Ma kenê ke bi hemserekîye nê modelî bidê gandarkerdene. 

	 

	Ma do xo newe ra înşa bikerê

	 

	Ma do qetî sîstemê xo yê hemserekîye ra fek vera nêdê. 20 serrî yo modelê ma yê îdareyanê herêmîyan est o. Ma do her çî ciwanan û cinîyan reyde bikerê. Ma do pêro meseleyanê ciwanan zî çareser bikerê. Zaf çi est o ke ganî ma bikerê. Ver bi nê weçîyan de çita ma ra dizîyabi ma do apey bigêrê. Ma do pêro texrîbatanê qeyûman wedarnê. Nê konferansî de zî ma newe ra înşakerdişî ser o nîqaşan bikerê.”