‘Ma do bi baretê xo yê sipî wareyan de bê’ 

2020-03-01 09:33:51


	 

	ÎZMÎR - Sereka Cinîyanê ewil yê Şubeyê ÎMO yê Îzmîrî Eylem Ulutaş Ayatare, da zaneyene ke do vera cinsîtî û betalîyê cinîyan têkoşîn bikerê û 8ê Adare de do bi baretê xo wareyan de bê. 

	 

	Şubeyê Odaya Muhendisî Înşaatê (ÎMO) yê Îzmîrî 22-23ê Sibate de 47in Heyetê Pêroyî yê Wextî ca ardî û yewin rey serekêk cinî weçînayî. Eylem Ulutaş Ayatare ke ameye weçînayene, dîyar kerde ke seba rolê cinsîtî yê komelî, wexto ke meslegê muhendîsê înşaatî tercîh kenê, rastê vindertişê cinsîtî yenê û vat, wendiş û meslegî de no dewam keno.

	 

	‘Meslegdarê ma zî wina nêzdî benê’

	 

	Eyleme vat rastê nêzdîbîyayîşê cinsîyetî yê meslegdaranê xo zî yenê û vat: “Heme muhendisê cinî, dimayê perwerdeyê cinsîtî yê komelî de nê cîyayîşî vînenê. Ma hem şube de hem zî Heyetê Koordînasyonê Merkezî de komîsyonê xebate awan kerdî. Ma tîya nêvat cinî, camêrdan ra berzîrî ya. Ma vat ma na meslege bi cinsê xo ney, bi mezgê xo kenê. Semedo ke cinî tewr zaf xo ra bawer bê, ma no proje da destpêkerdene. 100 muhendisê cinî no proje de estê. Ma sey pîlot dest pêkerd.”

	 

	‘Ma kede de estê la ma temsîlî de çin ê’

	 

	Eyleme dewam de vat ke, her çiqas bi caardene cinsîtî, wexto ke namzetî yê aye ameyo eşkarekerdene, dayîkbîyayîşê aye ameyo perskerdene û vat: “Camêrdan rê nêamebi perskerdene. Bêguman berpirsîyarîyê min o tewr pîl domanê min ê. La ê camêrdê min o zî. Ma her wext kede de estê la temsîlkarî de çin ê. Gere hem cesaretê ma bibo û hem zî ma bêrê vînayene.”

	 

	Eyleme eynî wextî de bale ante serê 8ê Adare Roja Cinîyanê Dinya û vat, do bi baretê xo yê sipî meydanan de bê.