Cinîyê kedkarî do 8ê Adare de seba heqanê xo wareyan de bê 2020-02-29 12:10:49   AMED - Temsîlkarê Sendîkayê Amedî dîyar kerdî yê ke bi KHKyan ameyî îxrackerdene û bi krîzê ekonomî wareyê kar ra ameyî dûrfistene, cinî bîyê û vatî ke 8ê Adare de seba waştişanê xo vejîyê wareyan. Eynî wextî de vengdayî pêro cinîyan ke vejîyê meydanan.   Endama Heyetê Îdarekarê Sendîkaya Kedkarê Xizmetê Weşî û Komelî (SES) Fatma Yildizhan, Sekretera Cinîyan ê Hûmara 1 ê Egîtîm Senî Zeynep Aykat, endama Heyetê Îdarekarî yê Sendîkayanê Kedkarê Xizmetê Îdareyê Herêmî û Heme Şaredarîyan (TUM BEL-SEN) Nîhal Yanik bi wesîleyê 8ê Adare Roja Cinîyanê Dinya heme cinîyan dawetê wareyan kerdî.   ‘Sebeb ferzkerdişê koletî yo’   Fatma Yildizhane da zanayene ke heme dinya de yê ke vernê de keda înan yena xespkerdene cinî yê û dîyar kerde ke zîhnîyetê serdest ê camêrdan ke îradeyê cinîyan çin hesibneno, ewro zî dewam keno û wina vat: “Yew parçeyê şîdetê serê cinîyan oyo ke wazenê cinîyan wareyê komelî ra dûr bifînê. Bi KHKyan xeylêk cinî karê xo ra ameyî dûrfistene. Amancê înan oyo ke cinîyan hepsê keyeyî bikerê. Cinîyan tena statuyê dayikbîyayîş, xizmetî de vînenê. Sîstem hewl dano ke koletî cinîyan rê ferz bikero.”   ‘Hewl danê ke cinîyan wareyê kar ra biancê’   Zeynep Akatî zî bale ante serê têkoşînê cinîyan û dîyar kerdî ke serra vîyarte têkoşînêko pîl dayê û verê nê de zî îhlalkerdişê heqan ê vera cinîyan vejîyayo sewîyeya tewr pîl û wina vat: “Îhlalkerdişê kede sey wareyê ma de zî zêde ame ciwîyayîş û nika zî dewam keno. Şertê îstîhdamê cinîyan goreyê ê camêrdan tewr kêm o. Fehmêko cinîyan wareyê kar ra biancê esto. Ganî ma vera nê bibê yew, kuçan û wareyan de ramojnê. Ma pêro cinîyan dawetê wareyê 8ê Adare kenê. Gere nê têkoşînî de heme cinî vajê ma zî estê.”   ‘Ma do têkoşînê xo biqîrê’   Nîhal Yanike zî bale ante serê têkoşînê heqê cinîyan û 8ê Adare û wina vat: “8ê Adare seba cinîyan rojêka zaf girîng o. Hîrê serrê peyîn de vera cinîyanê kedkar û karker îhlalkerdişê cidî estê. Ma nika şinê 8ê Adare. Ma do vera heme îhlalkerdene heqan, tacîz û tecawizê têkoşînê xo pîl bikerê û wareyan zî biqîrê.”