
Mamostaya ke ajanîye aye rê ameye ferzkerdene muracatê sucî kerde

2020-02-27 15:43:50


	&nbsp;

	AMED - Mamosta Pelda Sevîma ke Hetgirê Mudirê Perwerdeyî yê Neteweyî yê Amedî H.O. aye dawetê odeya xo kerdbî û polîsan hema vaje îfadeya aye girewtbî, muracatê sucî kerde.

	&nbsp;

	Hetgirê Mudirê Perwerdeyî yê Neteweyî yê Amedî H.O 20ê sibate de mamostaya muzîkî Pelda Sevîma ke qezaya Bismilî ya Amedî de Lîseya Anadoluye ya 15ê Temmuze de xebetîyena, dawetê Mudirîya Perwerdeyî ya Bajarî kerd. 3 polîsî odeya H.O.yî de mamosta Pelda Sevîme girewtî îfade û aye rê ajanîye ferz kerdbî. Peldaye vizêr derheqê rewşa xo de Şubeyê Amedî yê Komele Heqê Merdiman (ÎHD) de kombîyayîşê çapemenîye viraşte. Peldaye ewro zî derheqê babete de muracatê Serdozgerîya Komarî ya Amedî kerde.

	&nbsp;

	Keye wazeno ke hedîse bêro roşnkerdene

	&nbsp;

	Peldaye bi rayîrê avûkatanê xo derheqê Hetgirê Mudirê Perwerdeyî yê Neteweyî yê Amedî H.O.yî de muracatê sucî kerde û waşte ke kesê ke xo sey polîsan dayî şinasnayîş û aye rê ajanîye ferz kerdî bêrî tespîtkerdene û derheqê înan de tehqîqat bidîyo destpêkerdene. Keyeyê Peldaye zî waşt ke çîyo ke ameyo sereyê kênaya înan bêro roşnkerdene û da zanayene ke heta ke nê kesî nêvejîyî verê muhakeme do hedîse taqîp bikerî.

	&nbsp;

	Heto bîn de ame îdîakerdene ke Mudirê Perwerdeyî yê Neteweyî yê Amedî zî derheqê babete de tehqîqat dayo dest pêkerdene. &nbsp;

	&nbsp;