Serra Bucak li New Yorkê beşdarî Lûtkeya Pêşengiya Jinan bû 

2025-03-14 15:43:51


	 

	NAVENDA NÛÇEYAN - Hevseroka Şaredariya Mezin a Amedê Serra Bucak, beşdarî civîna 69'emîn a Komîsyona Statûya Jinan a Neteweyên Yekbûyî (NY) li New Yorkê bû û di axaftina xwe de têgihiştina rêveberiya xwecihî ya di perspektîfa têkoşîna jinên Kurd de şeklê girtiye û mînaka Amedê parve kir.

	 

	Hevşaredar Bucak, beşdarî çalakiya bi sernavê "Pekînî+30 Xwecihîkirin: Tevgera Şaredariyê Pêşengiya Rêya ber bi Wekhevî û Demokrasiyê ve dike" bû ku di çarçoveya 69'emîn Komîsyona Statûya Jinan (CSW69) de li New Yorkê hat lidarxistin. Di lûtkeyê de ku li Millennium Hilton New York, One UN Plaza pêk hat, şaredarên ji her derê cîhanê, nûnerên rêxistinên navneteweyî û rêberên femînîst beşdar bûn.

	 

	Rola jinan hat nîqaşkirin

	 

	Çalakî bi armanca xurtkirina pêşengiya jinan di rêveberiyên xwecihî de, nîqaşkirina modelên rêveberiyê yên piralî ji bo wekheviya zayendî, û hewildana pêşvebirina polîtîkayên femînîst di çarçoveya rojeva 2030'î de hate organîzekirin. Di lûtkeyê de polîtîkayên hestiyar ên zayendî, rola rêberên jin û hevkariyên navneteweyî ji bo dabînkirina wekheviyê hatin nîqaşkirin.

	 

	Pêşeng bû têkoşîna azadiyê

	 

	Di rûniştina "Xwecihkirina Wekheviyê: Pêşengiya Jinan û Rêveberiya Piralî bi Pekînî+30 û Rojeva 2030'î" de wek axiver beşdar bû, Hevşaredar Serra Bucak wiha got: "Ez îro li vir, di rûniştineke wiha girîng de ku armanc dike wekheviya zayendî ji xwecihî ber bi globalê ve bibe, bi we re bûm serbilind im. Ez ne tenê wek şaredarekê, lê di heman demê de wek aktîvîstekê jî li vir im. Jinên Kurd di dîrokê de ne tenê ji bo azadiya xwe, lê di heman demê de ji bo azadiya gelan jî têkoşîn kirine. Em neçar in ku hebûn û têkoşîna jinan li xwecihî li asta global zêdetir xuya bikin."

	 

	Serra Bucak domand: "Em têgihiştineke şaredariyê ya demokratîk, ekolojîk û azadîxwaza jinan pêk tînin. Sîstema hevserokiyê ne tenê parvekirina desthilatê ye, lê di heman demê de mekanîzmayeke demokratîk a taybet e ku ji meclisên jinan heta koordînasyonên jinan didome."

	 

	Bertek li hember polîtîkayên qeyûman

	 

	Serra Bucak bal kişand ser wê yekê ku qeyûmên ku ji bo şaredariyên DEM Partiyê hatine destnîşankirin di heman demê de li dijî têkoşîna jinan in û got: "Bi tayînkirina qeyûman li ser şaredariyên me, îradeya gel hatiye xesbkirin. Ev polîtîka ne tenê li dijî rêveberên hilbijartî ne, lê di heman demê de li dijî destkeftiyên jinan in. Têkoşîna jinan nikare di nav sînorên neteweyî de were hepskirin. Em divê piştgiriya navneteweyî çalak bikin da ku hebûna jinan li xwecihî biparêzin û bihêz bikin."

	 

	Tevgera jinan û pêvajoya aştiyê

	 

	Serra Bucak, ku bala xwe kişand ser gotûbêjên aştiyê yên li Tirkiyê ji bo çareserkirina pirsgirêka Kurdî, got: "Jin divê hêmanên bingehîn ên pêvajoya aştiyê bin. Wek ku di biryara NY a 1325'an de jî hatiye diyarkirin, jin divê di polîtîkayên aştî û ewlehiyê de roleke çalak bigirin. Tevgera jinên Kurd hêza herî mezin e ku vê pêvajoyê bi ser bixe."

	 

	Serra Bucak axaftina xwe bi gotinên "Jin, Jiyan, Azadî!" temam kir.