Dayikên Şemiyê: Bila kujer bên darizandin  

2024-08-24 13:54:46


	 

	 

	STENBOL - Dayikên Şemiyê di çalakiya xwe ya vê hefteyê de li aqûbeta Mehmet Yaşar pirsîn û xwestin kujer bên darizandin.

	 

	Dayikên Şemiyê ji bo aqûbeta xizmên xwe yên hatin windakirin bipirsin û kujer bên darizandin her hefte li Qada Galatasarayê çalakiya xwe li dar dixin. Vê hefteyê çalakiya xwe ya roja 1013'an li dar xistin. Dayikên Şemiyê bi qurnefîlên sor û pankartên wêneyên xizmên xwe yên winda hilgirtin, di çalakiya xwe ya vê hefteyê de aqûbeta Mehmet Yaşar pirsîn. Di çalakiyê de biraziya Hayrettîn Eren ê di girtîgehê de hat windakirin Setenay Yarici daxuyanî xwend.

	 

	'Ew bi Torosê Spî birin'   

	 

	Setenay bal kişand ser vê yekê ku Qada Galatasarayê dîsa bi bariyerên polîsan hatiye girtin û diyar kir ku vegotina çîrokên kesên hatine windakirin li dijî înkar û bêcezakirinê, li dijî her cure pêkanînên jibîrkirinê berxwedanek e. Setenay got, “Em dixwazin tiştên ku hatine serê me bên bihîstin û zanîn. Di hefteya 1013'an de em hatin gel hev ku em bêjin 'Me Mehmet Yaşar ê 30 sal berê di girtîgehê de hat windakirin ji bîr nekir.' Em dengê Malbata Yaşar a Galatasarayê ne, ku her çend ji aliyê fizîkî ve nikarin bi me re bin jî bi dil û can bi me re ne. Bavê 6 zarokan Mehmet Yaşar ê 32 salî li Geverê ya Colemêrgê dijiya. Ew esnaf bû. Gelek caran avêtin ser mala wî, hat binçavkirin û îşkenceya giran dît. Restorana ku ew şirîkê wê bû hat şewitandin û notên gefxwarinê yên li ser nivîsa 'Pêşî milkê te, paşê jiyana te' hatin hiştin. Taxa ku mal li Navenda Geverê ye saet di 20.00’an de ji aliyê leşker û polîsan ve hatiye dorpêçkirin. 4 kesên çekdar hatin mala ku Mehmet Yaşar lê bû, xwe wekî polîs dan nasîn û nasnameya wî kontrol kirin. Polîsên ku hatin malê, piştî kontrola nasnameyan kirin, Mehmet Yaşar bi gotina, 'Hûn ê bi me re werin emniyetê, em ê îfadeya we bigirin' binçav kirin. Mehmet Yaşar ê ku biTorosa Spî birin, careke din agahî jê nehat girtin"

	 

	'30 sal in çarenûsa Mehmet Yaşar di tarîtiyê de ye'   

	 

	Setenay, diyar kir ku hemû serlêdanên malbatê bê encam man û got ku hat redkirin ku Mehmet Yaşar hatiye binçavkirin. Setenay got, “Malbata ku lêgerîna xwe berdewam kir, rastî gef û zextan hat. Tevî hemû hewldanên malbata wî jî 30 sal e aqûbeta Mehmet Yaşar di tarîtiyê de ma; Sûcdar û berpirsyarên sûc bi zirxên bêcezakirinê hatin parastin. Bav Hamît Yaşar ku hewldanên wî bi ser neketin, 23 sal berê jiyana xwe ji dest da, têkoşîna xwe derbasî zarok û neviyên xwe kir. Daxwaza dayika Mehmet Yaşar Reyhan Yaşar, hevjîna wî Mehsima Yaşar û zarokên wan ên ku rastiyê bizanibin jî daxwazên me ne. Windakirinên di bin çavan de sûcên ku di çarçoveya qanûnê de ne. Em ji meqamên edlî daxwaz dikin ku ji bo aqûbeta Mehmet Yaşar eşkere bibe û sûcdar û berpirsên sûc bên darizandin û cezakirin, lêpirsîneke bi bandor bê destpêkirin. "Çiqas sal jî derbas bibin, em ê ji bo Mehmet Yaşar, ji bo hemû windahiyên xwe edaletê bidomînin û bi bîr bînin ku divê dewlet li gorî pîvanên hiqûqa gerdûnî tevbigere."

	 

	'Tu kevoka spî ya paşeroja min a azadiyê ye'  

	 

	Piştre keça Fehmî Tosun ê di girtîgehê de hat windakirin Jiyan Tosun nameya keça Mehmet Yaşar Evîn xwend. Name wiha ye: “Em zarokên bi hêz in ku nikarin para xwe ji her rengê jiyanê bi dest bixin, û para wan ji maf û edaletê têra wan nake ku gorek ji gewr wêdetir hebe. Zarokatiya min, kêfa min, azadiya min birin. Hemî gotin sêwî bûne, ger tu bêjî bêçaretî, wekî sê xwarinan e. Lêbelê divê her keçek bi hestên bavê xwe, lehengê xwe mezin bibe û jê were hezkirin. Wan ev yek di derbarê paşeroja me de pir dît. Weke zarokên we em her tim bi we serbilind bûn. Tu helbesta min î. Tu kevoka spî ya sibeyên min ên azad î. Tu rengê derdê min, bendewariya bêdawî ya diya min. Tiştê ku min diparêze tu yî. Tu Mehmet Yaşar î yê Dayikên Şemiyê yî."   

	 

	Herî dawî qurnefîl avêtin qada dorpêçkirî.