‘Li dijî tenêhiştina siyaseta Kurd têkoşîna yekbûyî berpirsyarî ye’  

2025-11-29 09:03:44


	 

	Melîke Aydin

	 

	ÎZMÎR - Endama Komîteya Navenda TOP’ê Dîdar Gul der barê ku CHP di heyeta çûye Îmraliyê de cih negirtiye axivî û got AKP û MHP ji polîtîkaya tenêhiştina tevgera siyasî ya Kurd re xizmetê dike û got: “Li dijî vê polîtîkaya tenêhiştinê divê têkoşîna yekbûyî ya civakî a demokrasiyê bê hûnandin. Ev berpirsyariyek e.”

	 

	Piştî biryara Komîsyona Hevgirtina Neteweyî, Xwişk-Biratî û Demokrasiyê ya ji bo hevdîtina bi Rêberê Gelê Kurd Abdullah Ocalan re,  heyeta ji nûnerekî AKP, MHP Û DEM Partiyê pêk dihat çûn hevdîtin kirin û pêvajo derbasî qonaxek nû bû. Li dijî biryara ku  Partiya CHP, DEVA, Gelecek û Saadetê  endam nedan heyetê, bertek zêde dibin.

	 

	Endama Komîteya Navenda Partiya Azadiya Civakî (TOP) Dîdar Gul der barê helwesta CHP’ê û geşedanên nû de axivî.

	 

	Tişta ku AKP’ê dixwest hat kirin

	 

	Dîdar Gul da zanîn ku pêvajoyek muzakereyê ya ku gav tên avêtin heye û komîsyona li meclîsê yekane garantor nebe jî peywira wê girîng e û got: “Cihgirtina partiyên wek CHP, TÎP’ê ya di komîsyonê de wê têkiliyên navbera dînamîkên muxalefeta civakî yên Tirkiye û têkoşîna gelê Kurd de bide xuyakirin. Em di pêvajoya têkoşînek hişk de ne. Belkî jî di vê pêvajoyê de tişta ku AKP’ê herî zêde dixwest, tenêhiştina gelê Kurd û pêşengê polîtîk ê gelê Kurd bû. Ji ber vê cihgirtina CHP’ê ya di komîsyonê de girîng bû. Lê ji ber vê jî neçûyîna wan a Îmraliyê jî bi heman awayî girîng e.  AKP’ê di polîtîkaya tenêhiştina Kurdan de tişta dixwest kir.”

	 

	‘CHP’ê bi zexta zemîna nîjadperest ev biryar girt’

	 

	Dîdar Gul da zanîn ku bi bangên nûnerên siyasî re gelê Kurd di zemîna gelek têkoşînan de bi CHP’ê re hatiye gel hev û wiha anî ziman: “Nokteya îro em hatin zemîneke ku bi zexta zemîna nîjadperest tê torelekirin heye. Lê em vê dibînin;Girseyek berfireh a gel a ku aştiyê edaletê dixwaze heye. Ji ber vê jî hem sosyalîst hem jî wek dostên Kurdan divê ev zemîn bê xurtkirin û em ji vê berpirs in. Ji ber vê jî daxuyaniyên lîderên siyasî yên CHP’ê şaş e.”

	 

	‘Hîna di bin bandora polîtîkaya înkarê de dimînin’

	 

	Dîdar Gul daxuyakirin ku CHP ji Kemalîzmê xwedî dibe û hîna ew kodên wê bi hinek dînamîkan di nav xwe de neguheriye û wiha bi lêv kir: “Hîna jî di alî ku bi Kurdan re bên gel hev gumanan dikin. Hîna di bin polîtîkaya înkarê de dimîne. Lê têkoşîna aştiyê bi Tirkiye û gelê Kurd bi sînor nîne.”

	 

	‘Divê CHP ji şaşiya xwe şûnde gavê bavêje’

	 

	Dîdar Gul diyar kir ku ji bo astengiyên li pêş aştiya civakî bê rakirin rol û mîsyonek girîng dikeve ser CHP’ê û wiha daxuyand: “Lê CHP’ê bi neçûna Îmraliyê re ev mîsyon neaniye cih. Encamên vê şaşiya dîrokî wê her kes bijî. Divê CHP ji vê şaşiyê şûnde vegere, şûnde gavê bavêje. CHP li hember hemû civakê berpirs e.  Ev biryara ku CHP’ê li gorî tabana nîjadperest girtiye, li hember hemû gel jî bêbepirsyarî ye. CHP ji berpirsyariya li dijî tabana nîjdperest direve.”

	 

	‘Divê polîtîkaya tenêhiştina Kurdan vala bê derxistin’

	 

	Dîdar Gul destnîşan kir ku divê polîtîkaya AKP’ê ya tenêhiştina Kurdan neyê jibîrkirin û wiha bi lêv kir: “CHP’ê şaşiyek kir. Em vê şaşiyê rexne dikin û li dijî vê ne. Ji bo ji vê şaşiyê vegere çi ji destê me bê em ê bikin. Divê dest ji polîtîkaya tenêhiştina Kurdan bê berdan, divê ev polîtîkaya vala bê derxistin. Derbarê pêvajoyê de gavên demokratîk ên divê bên avêtin hene. Ev gav jî bi sererastkirinên qanûnî divê bên kirin. Divê statuya ji bo zimanê Kurdî bê dayîn. Divê qeyûm bên rakirin. Bicihanîna daxwazên gelê kurd wê pêşiya demokratîkbûnê jî vebike. Ji ber vê jî têkoşîna yekbûyî gelek girîng e.”

	 

	‘Avakirina zemîna têkoşîna yekbûyî berpirsyarî ye’

	 

	Dîdar Gul di dawiya axaftina xwe de bi lêv kir ku zemînên têkoşîna yekbûyî baş pêk nayên û divê ev bê çareserkirin. Dîdar Gul wiha dawî lê anî: “Divê îro em ji şaşiyên dîrokî yên hatine kirin re bêjin şaşî ye lê ev jî bi avakirina zemîna yekbûyî ya li dijî AKP-MHP’ê pêkan e. Ligel van rexneyan divê em zemînên têkoşîna yekbûyî bi hev re biafirînin.”