AMED - Li gundê Tirspiyê yê navçeya Peyasê, bi hevkariya Gerînendetiya Polîtîkayên Jinan a Şaredariya Peyasê û Serokatiya Daîreya Xizmetên Jin û Malbatê ya Şaredariya Bajarê Mezin a Amedê, foruma jinan hate lidarxistin. 

 

Li gundê Tirspiyê yê navçeya Peyasê, bi hevkariya Gerînendetiya Polîtîkayên Jinan a Şaredariya Peyasê û Serokatiya Daîreya Xizmetên Jin û Malbatê ya Şaredariya Bajarê Mezin a Amedê, foruma jinan hate lidarxistin. Forum bi dirûşma “Gotina Me Neqediyaye, Em ê Bi Hev re Tundiyê Bisekinînin” pêk hat û Hevşaredara Şaredariya Bajarê Mezin Serra Bucak, endamên meclîsên şaredariyan, nûnerên rêxistinên jinan û gelek jinên li gund beşdar bûn.

 

Di forumê de Hevşaredar Serra Bucak axaftinek kir û bal kişand ser rola girîng a jinan di jiyanê de û wiha dewam kir: “Jin damezrîner û berdewamkerên jiyanê ne. Îro em li vir in da ku li ser pirsgirêk, daxwaz û hewcedariyên jinan ên li gund biaxivin. Pirsgirêkên wekî rê, av û veguhestinê rasterast bandorê li jiyana gundîyan, bi taybetî jinan, dikin. Lê em, wekî xwediyên rastîn ên vê jiyanê, dikarin van pirsgirêkan çareser bikin. Hem Şaredariya Bajarê Mezin hem jî Şaredariya Peyasê, di çarçoveya derfetên xwe de, li gel we ne.”

 

Lêgerîna çareseriyê ji bo pirsgirêkên taybet ên jinan

 

Serra Bucak, di axaftina xwe de bal kişand ser pirsgirêkên taybet ên jinan û wiha got: “Ji ber jinbûnê, em bi pirsgirêkên xweser re rû bi rû ne. Hem li Şaredariya Bajarê Mezin hem jî li Şaredariya Peyasê, yekîne û kesên ku hûn dikarin bi wan re bişêwirin hene.” Wê diyar kir ku şaredarî dê di vî warî de roleke çalak bilîzin û piştgiriyê bidin jinan.

 

Jinan pirsgirêkên xwe parve kirin, zarokan demên rengîn jiyan

 

Di forumê de jinan bi eşkereyî pirsgirêkên xwe yên civakî, aborî û jiyana rojane anîn ziman. Wan daxwaz û pêşniyarên xwe yên ji bo çareseriyê parve kirin û ruhê hevkariyê xurt kirin. Her wiha, ji bo zarokan çalakiyeke boyaxkirinê hate organîzekirin ku ev yek bû sedema kêfxweşiyê û rengekî xweş da forumê.

 

Ev forum wekî gaveke girîng hate nirxandin ji bo ku dengê jinên li gund bê bihîstin û hevkariya di navbera wan de were xurtkirin. Forum bi belavkirina broşûrên agahdarkirinê yên ji bo jinan bi dawî bû.