EDENE - Hevseroka Giştî ya HEDEP'ê Tulay Hatîmogûllari li Edeneyê bi gel re civiya û got: "Em jî dizanin ku eger em Tirkiyeyeke demokratîk dixwazin, eger em dixwazin aştî li Rojhilata Navîn pêk bê, beriya her tiştî divê pirsgirêka kurd li Tirkiyeyê bi rêbazên aştiyane û demokratîk bê çareserkirin.” 

 

Hevseroka Giştî ya Partiya Wekhevî û Demokrasiyê (HEDEP) Tûlay Hatîmogullari li Edeneyê bi gel re hat cem hev. Di civîna ku li oteleke bajêr pêk hat de Hevserokên Giştî yên Partiya Demokratîk a Gelan (HDP) ya Edeneyê Helîn Kaya û Mehmet Karakiş, Alîkara Hevserokatiya Berpirsiyarê Komîsyona Ked û Polîtîkayên Civakî ya HEDEP”ê Sevtap Akdag, parlamenter Perîhan Koca, Alî Bozan û Kamuran Tanhan û gelek kes beşdar bûn.

 

Axaftina Tûlayê ya di civînê de wiha ye: 

 

“Me hemûyan li Edeneyê bi saetên dirêj bi hev re xebitîn. Ez pir kêfxweş im ku bi we re kar dikim. Dema ku me li vir dest bi karê xebatên wekîltiyê kir, ez ji rêvebirên me, ji we, ji gelê me yê hêja û ji dayikên me yên têkoşînê gelek tişt fêr bûm.  Ez spasiyên xwe yên bêdawî pêşkêşî we hemûyan dikim. Em ê ji gelê xwe yê hêja hêj tiştan hîn bibin.

 

Me kongreyên xwe piştî hilbijartinê pêk anîn. Di dema hilbijartinê de me li seranserê Tirkiyeyê bi deh hezaran dost, gel, nûnerên sazî û beşên partiyan re bêhejmar hevdîtin pêk anîn. Armanca me ya herî mezin di van hevdîtinan de ew bû ku em di van hilbijartinan de çi xeletî kirine hesab bidin. Hevalên hêja, me encamên gelek girîng derxistine, me  di nav partiya xwe de dest bi pêvajoyek nûavakirinê kir, bi şêwirmendiya gelê xwe yê hêja re, li ser polîtîkayên xwe yên îtîfaqê, çawaniya xebatê di hilbijartinên herêmî de û em kolan bi kolan, tax bi tax, bi komîsyonan çawa bi rêxistin bikin nîqaşên berfireh kir. 

 

Ez li vê salonê xîtabî gelê me, jin û dayikên me dikim. Bila tu cîranan li pey xwe nehêlin, em bang li her kesî bikin ku HEDEP û xeta wê hembêz bikin. Werin em bi taybetî biçin ser yên ku nebawer in û wan îqna bikin.

 

Berdewamkirina plana têk birinê

 

Plana têkbirinê ya li hemberî Gelê Kurd ne tenê li Tirkiyeyê, li çar parçeyên Kurdistanê li Rojava jî didomînin. Di roja me ya îro de sedema ku hemû welatên Rojhilata Navîn li dijî hemû welatên rojavayî ne, nêzîkatiya wan a li pirsgirêka Kurd e. Em jî dizanin ku eger em Tirkiyeyeke demokratîk dixwazin, eger em dixwazin Rojhilata Navîn bibe welatekî ku aştiyê pêk bîne, beriya her tiştî pirsgirêka Kurd li Tirkiyeyê wê bi rêbazên aştiyane û demokratîk çareser bibe. Em soz bidin Gelê Kurd û dostên xwe yên li Rojava hatin qetilkirin ku em ê vê herêmê bi aştî û modela konfederalîzma demokratîk bînin cem hev. Yekane çareseriya hemû êş, şer û pevçûnên gelên li vê herêmê dijîn avahiyeke konfederal a demokratîk e. Damezrandina gel a xwerêxistinkirina xwe ye. Ne tenê li Tirkiyeyê bi hemû gelên Rojhilata Navîn re em ê vê bi hev re pêk bînin.

 

Feraseta îktîdarê ya li hemberî Filistinê

 

Mixabin Îsraîl ev demek e Xezeyê dagir kiriye. Ma ev nû ye? Na, 75 salên dawî yên polîtîkaya dagirkeriyê ya 100 salî, serdema pevçûn û şerê germ e. Niha eger êrişên berê yên li ser Xezeyê bi bîr bînin, ne mimkûn e ku mirov êrişên li ser Mescîda Eqsayê ya ku mirov diçin nimêjê qebûl bikin. Em duh û îro li cem gelê Filistînê yê bindest in. Em ji gelê Filistînê yê bindest hînî gelek tiştan bûn. Nêzîkatiyeke ku xwe dide alî gelê Filistînê, hemû peymanên leşkerî yên bi Îsraîlê re didomîne û qehweyê qedexe dike, wek hûn jî dizanin li Tirkiyeyê dest bi protestokirina qehweyê kirin, ev tenê pêkenok e. Em feraseteke wiha qebûl nakin. Niha jî Erdogan dixwaze di hilbijartinên herêmî de pirsgirêka Filistînê, gelê Filistînê yê bindest, mirina zarok û jinên wan ên hatine qetilkirin weke maddî bikar bîne. Em vê qebûl nakin, protesto dikin.

 

Pirsgirêka kurd û filistinê

 

Li Rojhilata Navîn du pirsgirêkên sereke hene. Yek pirsgirêka Filistînê ye, ya din jî pirsgirêka Kurd e. Heya ev her du pirsgirêk bi rêbazên aştiyane û demokratîk neyên çareserkirin, hevgirtina me ya navbera gelan û têkoşîna hevpar wê li herêmê bidome. Em ê bi hev re vê hevgirtinê bidomînin. Li aliyekî me şer e, li aliyê din jî xizanî ye ku bi qasî şer mexdûr dike. Hûn bi ÎHA û SÎHA’yên ku we bi pereyên me û gelê feqîr kirîne gelê Kurd qetil dikin. Ne mimkûn e ku em aborîya bi şer re bipejirînin, em nan dixwazin, ne guleyan. Em şer naxwazin, em aştî û aramiyê dixwazin. Em naxwazin herin şer, em dixwazin herin malên xwe û bi malbata xwe re nanê germ û şorba germ vexwin. Em Tirkiye û Kurdistaneke wiha dixwazin, hemû têkoşîna me wê ji bo vê bidome.

 

Em carek din nahêlin qeyûm bên tayinkirin

 

Li pêşiya me hilbijartinên herêmî hene û me daxuyaniyên berfireh da ku em ê ji bo van hilbijartinan xwe amade bikin.  Em ê wan şaredariyên ku mafê me ne, bigirin. Em ê nehêlin ku carek din qeyûm bên tayînkirin. Ji ber vê yekê em careke din bang li hemû gelê xwe yê Kurdistanê dikin; Di heman demê de em bang li hemû gelê xwe yê li Rojava dijîn di serî de Gelê Kurd dikin. Em ê şaredariyên xwe ji qeyûman bigirin. Şaredarî mala me ye û em ê li gorî têgihiştina xwe ya rêveberiyên herêmî mala xwe dîzayn bikin. Ji ber vê yekê em niha dest bi xebatê dikin. Ev xebat wê ne hewldana serkeftina hilbijartinan be, ev xebat wê bibe hewldana ku şaredariyên me winda nekin. Gel dê şaredariyan hembêz bike û em ê bixebitin ku nehêlin ew şaredariyan winda bikin. Gel wê şaredariyan xwedî derkeve.

 

Stratejiya me diyar e

 

Yên ku ditirsin li cem HEDEP'ê xuya bikin bila neyên û bi HEDEP'ê re pêşniyara tifaqê nekin. Ji ber vê yekê divê em tiştekî bişkînin. Divê tu kes dudilî nebe li vî welatî li kêleka kurdan raweste. Pirsgirêka kurd ne tenê pirsgirêka kurdan e, pirsgirêka kurd pirsgirêka hevpar a hemû kedkar, karker, gel, ciwan û jinên li vî welatî dijîn e. Têgihîştina ‘Eger em li ber vê pirsgirêkê bisekinin em ê bişewitin’ yek ji wan têgihiştinan e ku ev welat heta niha paşde çûye. Ji ber vê yekê em dibêjin rêbaza ku di van hilbijartinên herêmî de rasterast îradeya gelê me yê di nava hikûmetê de misoger bike jî rêbazeke ku rê li ber demokratîkbûna Tirkiyeyê veke. Divê em vê pirsgirêkê bi navê xwe çareser bikin. Stratejiya me ya li Kurdistanê diyar e, prensîbên ku wê zemîna nêzîkatiya me ya stratejîk a li Rojava deynin diyar in. Wê demê tenê tişta maye ew e ku mirov pir bixebite. Bi şev û roj dixebitin. Werin em ji niha û pê de dest bi xebata xwe bikin, bêyî ku wextê xwe winda bikin, ji bo ku destê xwe xurt bikin, bi taybetî jî bêyî ku li bendê bin ka dê li Edeneyê çi bibe. Bi kêrî me nayê ku em li bendê bin. Bendewarî tiştek e ku sîstem ji me dixwaze. Me biryara xwe daye, divê em derî bi derî dest bi xebatê bikin.

 

Wek Behra Spî serhişk in

 

Em wek tava Edeneyê serhişk in. Tava Edeneyê dema ku baran dibare hewl dide ku derkeve nav ewran. Erê, em serhişk in, wek pêlên dijwar ên Behra Spî serhişk in. Lê em jî wek Çiyayên Torosê, wek Cîlo, wek Çiyayê Araratê jî serbilind in. Em ê bi vê hest û ramanê, bi vê serbilindî û helwesta xwe ya rast di hemû nirxên xwe de bi her wateyî em vê yekê bidomînin. Ji vir em weke rêhevalên Denîz, Mahîr, Kaypakkaya, Hikmet Kivilcim, wek hevrêyên bindestan Sevê, Sakîne. Divê em serdemeke ku me hêza xwe tê de weke tevgereke şoreşger, çep sosyalîst û welatparêzî kiriye yek, hîn xurtir bikin. Ez we hemûyan bi hurmet û hezkirin, bi baweriya ku em ê bi ser bikevin silav dikim. Serkeftin.”