Dewreya perwerdeya ji bo zimanê dayikê dest pê kir 

2018-09-13 16:02:40


	 

	Ronîda Hacî  

	 

	
		TIL TEMIR - Meclîsa Kongreya Star a Bajarê Til Temir a Kantona Hesekê dewreyek bi navê 'Zimanê dayikê hebûn e' vekir.
	
		 


	Meclîsa Kongreya Star bi armanca fêrbûna zimanê dayikê dewreyek bi navê 'Zimanê dayikê , hebûn e' li meclisa Kongreya Star vekirin, dewre ji 12 endam û rêveberiyên Kongreya Star pêk tê. Dersa zimanê Kurdî ji aliyê Mamosteya Ziman Sîmav Neamo tê dayîn  .

	 

	'Em ê fêrî zimanê dayikê bibin û karê xwe bi serkeftî bikin '

	 

	Endama Kongreya Star Dilşa Yûnis diyar kir ku ev dewre bi xwesteka wan hate vekirin û got "Em îro bi kêfxweşî dewreya zimanê kurdî dibînin, dewreya me 2 saetan dewam dike, em dixwazin fêrî zimanê dayikê bibin û xwedî li nasnameya xwe derkevin, di kar û xebatê me de xwendin pêwîst e lewma em jî bi armanca xurtkirina kar hatine fêrî zimanê dayikê bibin ."

	 

	'Xwedî li zimanê xwe derkevin û fêrî zimanê cîran jî bibin '

	 

	Endama Rêveberiya Pêwendiyên Diplomasiyê ya Kongreya Star Eliya Oglo ku ji pêkhateyên Ereb e wiha got: "Mirov gerek despêkê xwedî li zimanê dayikê derkeve, kurd zimanê xwe nas bike, Ereb û Ermenî zimanê xwe nas bikin. Her kes divê di despêkê de li zimanê xwe xwedî derkeve paşî fêrî zimanê cîran bibe. Ez zimanê xweyî erebî nas dikim û kêfxweş im ku tevlî vê dewrê bûm û fêrî zimanê Kurdî dibim."

	 

	'Pişaftina ziman pişaftina nasnameya netewekî ye'

	 

	Eliyayê wiha dewam kir:"Zimanê dayikê nasname ye û pişaftina zimanê dayikê pişaftina wî neteweyî ye ,gerek mirov li hember pişaftinê têbikoşe û xwedî li nasnameya xwe derkeve ."

	 

	Eliyayê axaftina xwe wiha bi dawî kir: " Ez bang li hemû netewan dikim ku hişyar bin û xwedî li nasnameya xwe derkevin, pir poltîkayên qirêj bi armanca pişaftina zimanê dayikê tê meşandin. Li hember van polîtîkayan dibe em hişyar bin û xwedî li hebûna xwe derkevin."

	 

	Dewreya bi navê 'Zimanê dayikê, hebûn e 'dê mehekê dewam bike .