Fîdan Dogan hat bibîranîn 

2026-01-09 16:57:56


	 

	MEREŞ - Fîdan Dogan a ku li Parîsê hate kuştin, li ser gora xwe li Elbîstanê hate bîranîn. Gulistan Kılıç Koçyigit a ji DEM Partiyê di bîranînê de axivî û got, "Komkujiya Parîsê ya 9'ê Çile kemîn û sabotajek li dijî aştiyê bû."

	 

	Tevgera Jinên Azad (TJA), Meclîsa Jinan a Partiya Wekhevî û Demokrasiyê ya Gelan (DEM Partî) û Meclîsa Jinan a Partiya Herêmên Demokratîk (DBP) Fîdan Dogan li ser gora wê ya li Elbîstanê bi bîr anîn. Bîranîn, ku li goristana navçeya Elbîstanê ya Mersînê hate lidarxistin, Gulistan Kiliç Koçyigit, Cîgira Serokê Koma DEM Partiyê, Berîvan Bahçeci, Berdevka Meclîsa Jinan a DBP'ê û Dayikên Aştiyê beşdar bûn.

	 

	Jin bi qîrîna dirûşmeyên wekî "Jin, jiyan, azadî" û "Şehîd namirin"  ber bi goristanê ve meşiyan. Piştre ji bo bîranîna kesên ku di têkoşîna azadiyê de jiyana xwe ji dest dane, deqeyek rêz hate girtin.

	 

	'Komkujiya 9'ê Çileyê kemînek bû'

	 

	Gulistan Kiliç Koçyigit bal kişand ser girîngiya Pêvajoya Aştî û Civaka Demokratîk ku ji hêla Rêberê Gelê Kurd Abdullah Ocalan ve di 27'ê Sibatê de hatiye destpêkirin û got, "Birêz Ocalan, bi berpirsiyariyeke mezin, her hewlekê dide da ku sedsala 21'an bibe sedsala çareseriyan, sedsalek ku pêşeroja hevpar a Kurd û Tirkan tê de hatiye nivîsandin. Lê em dibînin ku, li kêleka hişên ku çareseriyê dixwazin, hişê ku li ser bêçareseriyê israr dike jî heye. Di seranserê dîrokê de, li dijî aştiyê sabotajên domdar hebûn. Komkujiya 9'ê Çileyê kemînek li dijî aştiyê bû. Îro, em hemî dibînin ku heman hişmendiya dijî-çareseriyê dîsa li ser kar e. Ji ber vê yekê, dema ku em sê hevalên xwe, sê jinên ku me di 9'ê Çile de winda kirin, bi bîr tînin û dema ku em soz didin ku em ê bi bîranîn û têkoşîna wan re dilsoz bin, divê em tekez bikin ku yek ji aliyên herî girîng ên meşandina vê têkoşînê îro pêşvebirina Pêvajoya Aştî û Civaka Demokratîk e. Em pir baş dizanin ku divê em li pişt banga aştiyê ya Birêz Ocalan bisekinin."

	 

	Gulistan Kiliç Koçyigit êrîşên li dijî gelê Kurd li Şexmeqsud, Eşrefiye û Beni Zed ên Helebê şermezar kir û banga yekîtîyê di navbera gel de kir.

	 

	Bîranîn bi danîna qurnefîlan a li ser gora Fidan Dogan û bi slogana "Şehîd Namirin" bi dawî bû.