Tevî binpêkirinan daxwaz naguherin: Em aştiyê dixwazin! 2025-11-29 09:05:03   Gulistan Gulmuş   DÎLOK - Xizmên girtiyan diyar kirin ku tahliyeya girtiyên siyasî bi hincetên kêfî tên taloqkirin û wiha gotin: “Em dixwazin zarokên xwe bibînin. Yekane daxwaza me ev e. Em aştiyê dixwazin. Bila girtî bên berdan, zarokên me nemirin.”   Li girtîgehên Tirkiye û Kurdistanê binpêkirinên mafan her diçin giran û zêde dibin. Tahliyeya girtiyan bi hincetên kêfî tê talqokirin. Dîsa ligel pirsgirêkên tenduristiyê yên cidî, girtî binpêkirinên maf û krîza aborî re tên rû hev.  Xizmên girtiyan ên ku girtiyên wan li bajarên dûr in di alî çûyîn û hatinê de zehmetiyan dikşînin. Ji ber xizanî û krîza aborî xizmên girtiyan bi mehan nikarin biçin cem zarokên xwe.   Rêberê Gelê Kurd Abdullah Ocalan di 27’ê Sibatê de banga ‘Aştî û Civaka Demokratîk’ kir û hêviya aştiyê bi bangê re afirî. Di pêvajoya salekê ku bang hatiye kirin de daxwazên esas ên gelê Kurd hene. Di serî de azadiya Rêberê Gelê Kurd Abdullah Ocalan û girtiyan e.   Li navçeya Şehîtkamîl a Dîlokê xizmên girtiyan ên tevli hevdîtinê bûn daxwaz û pêvajo nirxandin.     ‘Em bi malbatên polîs û leşkeran re aştiyê bixwazin’   Perîşan Akin a ku birayê wê Bedrî Akin 17 sal in girtiye û tahliyeya wî her tim tê taloqkirin diyar kir ku birayê wê li girtîgehên Şirnex, Amed, Dîlok, Bolû û Enqereyê maye. Perîşan Akin wiha got: “Bi salan e bi tena serê xwe di hucreyê de dimîne. Gelek zext û dijhiqûqî hene. Em malbatên girtî û şehîdan dixwazin pêvajo baş bimeşe. Bila girtî bên berdan. Bila zimanê me qedexe nekin. Em aştiyê dixwazin. Bila leşker, polîs û tu kes nemirin. Hemû dayik wekhev in. Bila negirîn. Aştî ne tenê ji bo me, ji bo hemû gelan e. Bila dayikên leşker û polîsan ligel me bin, em bi hev re biçin meclîsê û aştiyê bixwazin.”   Kurê wê 36 sal in girtiye   Hanîfe Çelîk jî diyar kir ku kurê wê Abdullah Çelîk 36 sal in girtiye û aştiyê dixwaze. Hanîfe Çelîk ev tişt anî ziman: “Kurê min heta niha li gelek girtîgehan maye. Ceza diqede, ji nûve 3 meh taloq dikin. Niha li Aksarayê dimîne. Ez dixwazim ku beriya bimrim kurê xwe bibînim. Yekane daxwaza min ev e. Bila aştî pêk bê. Bila girtî bên berdan. Bila xwîn nerêje.”   ‘Bila zarokên me berdin’   Ayniye Orhan ku kurê wê Necmettîn Orhan 36 sal in girtiye û niha li girtîgeha Şakranê dimîne jî wiha vegot: “Em aştiyê dixwazin. Em serokê xwe dixwazin. Em dixwazin wek her kesî bijîn. Bila zarokên me berdin. Bila ne dayikên Tirk ne yên Kurd êdî êşê nekişînin.”   ‘Me ji nêzîkatiya CHP’ê hez nekir’   Sakîne Behçet jî da zanîn ew hêvî dikin aştî were û wiha dewam kir: “Em her tim aştiyek rastîn dixwazin. Bila kesî nexapînin. Ev demek pêvajoya aştiyê heye lê hîna gavek şênber tuneye. Heyetek çû Îmraliyê.  Em dixwazin girtî bên berdan. Bila şaredariyên me bidin me. Me ji vê nêzîkaiya CHP’ê hez nekir. Ji Kurdan nebûna wê CHP îro di vê astê de nebûna. Wê evqas deng negirtiba. Me ji bo axa xwe pir têkoşîn da. Em nikarin zimanê xwe înkar bikin. Zimanê me mafê ye. Hêvîda rim aştî were.”   ‘Ji bo her kesî aştiyê dixwazim’   Sozdar Akbaş jî ji bo birayê xwe wiha vegot: “Cezayê muebetê dan birayê min. 5 zaorkên wî hebûn. Ez ji bo her kesî aştiyê dixwazim. Ez piştgiriyê didim pêvajoyê. Di her malbatekê de 2-3 girtî hene. Werin em bi hev re ji bo aştiyê têbikoşin.”   Girtiyên cezayên wan qedyane jî nayên berdan   Xebat Gengeç jî diyar kir ku tahliyeya girtiyên nexweş tê taloqkirin û wiha dawî lê anî: “Hêvîdar im aştî were. Pismamê min Selîm Hacer 29 sal in girtiye û nexweş e. Berê li vir girtî bû niha birine Kayseriyê. Dayika wî bi hesreta wî jiyana xwe ji dest da. Bavê wî kal e. Tevî cezayê wî qedyaye, bernadin. Niha felc e. Em dixwazin girtî bên berdan. Ez dixwazim em li welatê azad bijîn.”