Sumeyye Boz: Tecrîd li her qadên jiyanê belav dibe 

2024-10-06 09:04:39


	 

	 

	WAN - Parlamentera DEM Partiyê ya Mûşê Sumeyye Boz jî têkildarî tecrîda li ser Rêberê PKK’ê Abdullah Ocalan axivî û diyar kir ku tecrîd li hemû qadên civakê belav bûye û got, “Tecrîd sûcekî navneteweyî ye. Divê bi dawî bibe."

	 

	Tecrîda li ser Rêberê PKK'ê Abdullah Ocalan ku li Girtîgeha Girtî ya Ewlekariya Bilind a Tîpa F a Îmraliyê 43 meh in tu agahî jê nayê girtin dewam dike. Hevdîtinên malbat û parêzerên wî bêbersiv man. Di dema ku daxwazên hevdîtinê yên parêzer, malbat û heyetan bi hinceta cezayên dîsîplînê tên astengkirin, bertekên li hemberî tecrîdê yên di nava civakê de dewam dikin.

	 

	Parlamentera Partiya Wekhevî û Demokrasiyê ya Gelan (DEM Partî) a Mûşê Sumeyye Boz, têkildarî tecrîdê nirxandin kirin.

	 

	'Ev 4 sal in ku kêmasiya ragihandinê heye'

	 

	Sumeyye diyar kir ku tecrîda li ser Rêberê PKK'ê Abdullah Ocalan ji roja ku bi komployeke navneteweyî anîne Îmraliyê ve hatiye avakirin û got, "Dema ku behsa tecrîdê tê kirin, divê pêvajoya ku bi anîna wî ya giravê re dest pê kiriye, were nirxandin. Lêbelê, di van çar salên dawî de kêmasiyek a ragihandinê heye. Bi malbat, parêzer û heyetên xwe re hevdîtin tê astengkirin."

	 

	'Tecrîd sûcekî navneteweyî ye'

	 

	Sumeyye diyar kir ku divê tecrîd hem ji aliyê wijdanî, hem jî ji aliyê exlaqî ve bi pîvana wê ya siyasî bê nirxandin û wiha got:"Tecrîd sûcekî navneteweyî ye. Divê bi dawî bibe. Ji ber ku di qanûnên navneteweyî û platformên mafên mirovan de gelek caran tê îfadekirin û di van demên dawî de di rojevê de ye, 'binpêkirina mafê hêviyê' heye û ev sûcekî navneteweyî ye. Ev sûc li Tirkiyeyê li dijî Birêz Ocalan û girtiyên din ên bi wî re tê kirin."

	 

	'Tecrîd li jiyana civakî tê kirin'

	 

	Sumeyye diyar kir ku tecrîda li Îmraliyê dest pê kir û li girtîgehên din jî belav bû û destnîşan kir ku li girtîgehên tîpa nû jî tecrîd tê meşandin. Sumeyye got, “Ev pergala tecrîdê nîşanî me dide ku çawa tê xwestin ku di warê civakî de û bi pêkanîna wê li girtîgehên cureyên nû yên din were pêkanîn û domandin. Kesekî ku tê cezakirin heye. Di heman demê de, em dibînin ku li ser hemû pergalên cezakirinê yên ku têr nayên dîtin jî, ev kes di nava pergala cezayê de ne jî, pêkanîneke din a ku bi cureyên nû yên girtîgehan tundî, zext û îstîsmarê kûr dike. Û ev yek dide xuyakirin ku tecrîd çawa xwe nîşan dide, tê ferzkirin û ji siyasetê dest pê dike di qada civakî de hewl dide bê avakirin."

	 

	 'Pirsgirêk tenê ne bi girtîgehan e'

	 

	Sumeyye diyar kir ku tecrîda mijara gotinê ne tenê ne ji bo girtiyan e û got, “Helwesta li hemberî xizmên girtiyan jî di xaleke ku tecrîdê tîne rojevê de ye. Ev gelek encamên hestyarî û aborî bi xwe re tîne. Di hundirê girtîgehê de jî em dibînin ku kiryarên nehiqûqî li hemberî girtiyan derdikevin pêş. Herî dawî em bûn şahid ku Dayikên Aştiyê li ser rêya hevdîtinê jiyana xwe ji dest didin. Dema ku em bi vî rengî lê dinêrin, mijar tenê bi pîvana girtîgehê re sînordar namîne. Ew veguheriye pirsgirêkek bi endamên malbatê yên ku ji wan hez dikin, piştgirî didin wan û bi wan re nêzikbûnê saz dikin. Di vê wateyê de pêwîst e di aliyê civakî de were nirxandin."

	 

	'Rastiya ku derdikeve pêş dihêle ku polîtîkayên tecrîdê normal bibin'

	 

	Sumeyye, bal kişand ser pîvana mirovî ya girtîgehê jî, diyar kir ku tecrîd di her aliyê jiyanê de bi polîtîkayên cuda xwe dide der û got, “Em dibînin ku tecrîd bi awayên cuda xwe nîşan dide. Rastiya ku derdikeve pêş dihêle ku polîtîkayên tecrîdê normal bibin. Bi rastî jî têkoşîn û berteka me ji vir dest pê dike. Li dijî polîtîkayên tecrîdê yên ewqas asayî dibin, pêwîst e bi têkoşîneke siyasî û civakî em dengê xwe bilind bikin. Ji ber ku em dibînin ku wê gav bi gav li hemû qadên jiyanê belav bibe. Ev yek di têkoşîna jinan de tê kirin. Tevgera Jinên Azad (TJA) avahiyeke ku li ser navê têkoşîn û berxwedanê jinan dengê herî xurt bilind dike, lê em dibînin ku her tim zext li hemberî jinan tê kirin."

	 

	'Tecrîd li her qada civakê belav bûye'

	 

	Sumeyye, bal kişand ser tundî, pêkanînên nehiqûqî û nehiqûqî yên polîsan ên di bûyerên civakî de tên kirin û got, “Êrîş û zextên li ser xebatkarên Çapemeniya Azad ên ku li ser gendelî û bêhiqûqiyên ku di mekanîzmayên saziyan de derketine holê radigihînin, rastî tecrîdê jî tên. Ji ber vê yekê tecrîd ne tenê pirsgirêka Girtîgeha Îmraliyê ye. Dema em dibêjin 'ew li her qada civakê belav bûye', em behsa vê yekê dikin ku em karibin vê têkiliyê nas bikin û karibin bersivê bidin wê."

	 

	'Îktîdar xwe bi yekbûnê diafirîne'

	 

	Sumeyye da zanîn ku gotina "tecrîd" tê wateya yekbûn û pêçandina wê di nava sîstemeke homojen de û polîtîkayên "yek ziman, yek dewlet, yek netewe" bi bîr xist. Sûmeyye, da zanîn ku polîtîkaya tecrîdê bi rêya hikûmetê pêk hatiye û wiha got: “Dema ku em li êrîşên îro yên li ser Kurdan dinêrin, em dibînin ku ev êrîş berhema nêzîkatiya 'yek zimanî' ye. Zilm û zordariya li ser gelê Kurd bi operasyonên siyasî, binçavkirin û girtina siyasetmedaran û cezayên nepêwîst, berhemên projeya 'yek netewe' ne. Di nav sînorên welatekî din de li dijî gelan hewldanên şer hene, ji aliyê parlamentoyê ve biryara şer heye. Li cihên sivîlan ên ku tên bombekirin hene. Dema ku em lê dinêrin, ev yek mijara 'yek ummet, yek milet' tîne rojevê. Ne pêkan e ku mirov hizir bike ku zîhniyeta desthilatdar a ku xwe bi yekbûnê diafirîne, hewl dide xwe biparêze û bi van hewl dide jiyanê bidomîne, tenê bi rêya girtîgehan polîtîkaya xwe ya tecrîdê pêk tîne."

	 

	Ji bo mîtînga 13’ê Cotmehê ya Amedê bangawazî 

	 

	Sumeyye di axaftina xwe ya li dijî tecrîdê de bal kişand ser vê yekê ku divê ev yek tenê bi girtîgehan, xizmên girtiyan û Dayikên Aştiyê nemîne û destnîşan kir ku divê hemû civak vê berpirsyariyê hîs bike. Sumeyye got, “Ji bo ev bertek zêde bibe, bi pêşengiya Partiya Herêmên Demokratîk (DBP) di salvegera Komploya Navneteweyî ya 13’ê Cotmehê de, bi daxwaza şikandina tecrîdê û temînkirina azadiya fizîkî Birêz Ocalan û vekirina rêyên diyalogê yên pêwîst ji bo çareseriya demokratîk a pirsgirêka Kurd, xeteke çalakiyê tê rêxistinkirin. Em bang li hemû komên hestiyar dikin ku deng û hêza xwe li vê çalakiyê zêde bikin.”